महाराष्ट्र संवाद न्यूज ऑनलाईन वृत्त
संगमनेर, प्रतिनिधी:
राज्याचे माजी मंत्री बाळासाहेब थोरात यांच्या मार्गदर्शनाखाली, सहकार क्षेत्रातील अग्रेसर असलेल्या संगमनेर तालुका सहकारी दूध उत्पादक संघाच्या (राजहंस दूध संघ) संचालकपदी खांडगाव येथील रमेश लहानभाऊ गुंजाळ यांची बिनविरोध निवड करण्यात आली आहे.
२५ जुलै २०२५ रोजी राजहंस दूध संघ येथे काँग्रेसचे माजी प्रदेशाध्यक्ष बाळासाहेब थोरात यांच्या प्रमुख उपस्थितीत झालेल्या बैठकीत ही निवड प्रक्रिया पार पडली. उपनिबंधक सहकारी संस्था संगमनेर तथा अध्यासी अधिकारी संतोष कोरे यांच्या अध्यक्षतेखाली संगमनेर तालुका सहकारी दूध उत्पादक व प्रक्रिया संघाच्या संचालक मंडळातील रिक्त जागेवर गुंजाळ यांची एकमताने निवड करण्यात आली.
यावेळी दूध संघाचे अध्यक्ष रणजितसिंह देशमुख, उपाध्यक्ष राजेंद्र चकोर, ज्येष्ठ संचालक लक्ष्मणराव कुटे, युवक काँग्रेस अध्यक्ष डॉ. जयश्री थोरात, तालुकाध्यक्ष अजय फटांगरे, शहराध्यक्ष सोमेश्वर दिवटे यांच्यासह संघाचे विविध पदाधिकारी आणि कार्यकर्ते उपस्थित होते.
रमेश गुंजाळ हे माजीमंत्री बाळासाहेब थोरात, माजी आमदार डॉ. सुधीर तांबे आणि आमदार सत्यजित तांबे यांच्या मार्गदर्शनाखाली सातत्याने युवक संघटनेचे काम करत आहेत. सहकारमहर्षी भाऊसाहेब थोरात सहकारी साखर कारखान्याचे संचालक म्हणून त्यांनी दहा वर्षे यशस्वीपणे काम केले आहे.
या निवडीबद्दल बोलताना माजी मंत्री बाळासाहेब थोरात म्हणाले की, संगमनेर तालुक्यात दररोज नऊ लाख लिटर दूध उत्पादन होत असून, दूध हा तालुक्याचा मुख्य व्यवसाय बनला आहे. दूध व ऊस हे शाश्वत उत्पन्न असून, संगमनेर तालुका दूध संघाने शेतकऱ्यांच्या जीवनात आर्थिक समृद्धी आणली आहे. रमेश गुंजाळ हे तरुण आणि उत्साही कार्यकर्ते असून, त्यांच्या अनुभवाचा संघाला नक्कीच फायदा होईल.
या निवडीबद्दल रमेश गुंजाळ यांनी बाळासाहेब थोरात यांच्या मार्गदर्शनाखाली आपण एकनिष्ठेने समाज विकासाचे काम केले असून, यापुढेही राजहंस दूध संघाच्या माध्यमातून दूध वाढीसाठी आणि सहकारातून शेतकरी व गरजूंना मदत करण्यासाठी काम करत राहण्याचे आश्वासन दिले.
रमेश गुंजाळ यांच्या या निवडीबद्दल काँग्रेस नेते बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, दुर्गाताई तांबे, इंद्रजीत थोरात, डॉ. जयश्री थोरात यांच्यासह अमृत उद्योग समूहातील विविध पदाधिकारी आणि तरुण कार्यकर्त्यांनी अभिनंदन केले आहे.
