लॅब कर्मचाऱ्याला लूटणाऱ्या तिघांना अटक; चौथा आरोपी फरार

महाराष्ट्र संवाद न्यूज ऑनलाईन – 

सिन्नर-शिर्डी महामार्गावर मिरगाव फाट्याजवळ रात्रीच्या वेळी एका लॅब टेक्निशियनला मारहाण करून १५,००० रुपये लुटणाऱ्या तिघांना वावी पोलिसांनी मोठ्या शिताफीने अटक केली आहे. या घटनेतील चौथा आरोपी मात्र अद्याप फरार असून, पोलीस त्याचा कसून शोध घेत आहेत.

मागील महिन्यात ही घटना घडली होती. वावी येथे लॅब टेक्निशियन म्हणून काम करणारे सुधाकर सोपान वक्ते (वय ३५) हे आपले काम संपवून रात्री ८ च्या सुमारास जेऊर कुंभारी (कोपरगाव) येथील आपल्या घरी परत जात असताना चोरट्यांनी त्यांना गाठले. यावेळी त्यांना मारहाण करून त्यांच्याकडील १५,००० रुपये हिसकावून चोरट्यांनी शिर्डीच्या दिशेने पळ काढला होता.

या घटनेनंतर सुधाकर वक्ते यांनी तात्काळ पोलिसात तक्रार दाखल केली. वावी पोलिसांनी तपासाची चक्रे फिरवत अवघ्या आठ दिवसांच्या आत संशयितांना ताब्यात घेतले. पोलिसांनी दिलेल्या माहितीनुसार, महेश बाबुराव सोळके (२४), धीरज नंदकिशोर गुंडगळ (२४) आणि भारत भागवत बांगर (२४) या तिघांना नाशिक येथून वेगवेगळ्या ठिकाणी सापळा रचून अटक करण्यात आली. हे सर्व आरोपी नाशिकमध्ये लॅब टेक्निशियन म्हणून काम करतात.

सुरुवातीला आरोपींनी उडवाउडवीची उत्तरे दिली, परंतु पोलिसांनी कसून चौकशी केल्यावर त्यांनी गुन्ह्याची कबुली दिली. सहाय्यक पोलीस निरीक्षक गणेश शिंदे यांच्या मार्गदर्शनाखाली पोलीस उपनिरीक्षक विजय कोठावळे यांच्या पथकाने ही कारवाई केली. या प्रकरणातील चौथा आरोपी अमर राकेश वळवी (रा. नवापूर, जि. नंदुरबार) हा अद्याप फरार असून, पोलीस त्याचा शोध घेत आहेत.

अटक करण्यात आलेल्या आरोपींना सोमवारी (दि. ८) सिन्नर न्यायालयात हजर करण्यात आले असता त्यांना एक दिवसाची पोलीस कोठडी सुनावण्यात आली. हे आरोपी सराईत गुन्हेगार आहेत की कुणाच्या सांगण्यावरून त्यांनी हे कृत्य केले, याचा पोलीस तपास करत आहेत.