आता राज्यात नो पीयूसी, नो फ्युएल धोरण लवकरच लागू होणार

मुंबई – विशेष प्रतिनिधी

पुढील पिढीला प्रदूषणमुक्त वातावरण देण्यासाठी परिवहन मंत्री प्रताप सरनाईक यांनी एक महत्त्वाकांक्षी पाऊल उचलले आहे. राज्यातील सर्व पेट्रोल पंपांवर ‘नो पीयूसी, नो फ्युएल’ (नो प्रदूषण नियंत्रण प्रमाणपत्र, नो पेट्रोल) हे धोरण लवकरच सक्तीने लागू केले जाईल.

या अनुषंगाने परिवहन आयुक्त कार्यालयात आयोजित बैठकीत परिवहन मंत्री बोलत होते. या बैठकीला परिवहन आयुक्त विवेक भीमनवार, सह सचिव (परिवहन) राजेंद्र होळकर यांच्यासह वरीष्ठ अधिकारी उपस्थित होते.

या बैठकीत ठरलेल्या धोरणानुसार, पेट्रोल पंपांवर सीसीटीव्ही कॅमेऱ्यांच्या मदतीने प्रत्येक वाहनाचा क्रमांक स्कॅन केला जाईल, जेणेकरून त्याच्या प्रदूषण नियंत्रण प्रमाणपत्राची (PUC) वैधता तपासली जाईल. जर एखाद्या वाहनाकडे वैध पीयूसी प्रमाणपत्र नसेल, तर त्याला इंधन दिले जाणार नाही. ही गैरसोय टाळण्यासाठी, प्रत्येक पेट्रोल पंपावर लगेच पीयूसी प्रमाणपत्र काढण्याची सोय उपलब्ध केली जाणार आहे. यामुळे वाहनचालकांना वेळेवर प्रमाणपत्र मिळवणे शक्य होईल.

या नवीन नियमांतर्गत, प्रत्येक पीयूसी प्रमाणपत्राला एक विशिष्ट ओळख क्रमांक (UID) दिला जाईल. यामुळे प्रमाणपत्राची वैधता वेळोवेळी तपासता येईल. तसेच, भविष्यात वाहन विक्री करणाऱ्या शोरूम्स आणि दुरुस्ती करणाऱ्या गॅरेजेसमध्येही पीयूसी प्रमाणपत्र देण्याची व्यवस्था केली जाईल. या उपाययोजनांमुळे रस्त्यावर धावणाऱ्या प्रत्येक वाहनाकडे वैध पीयूसी असेल आणि त्यामुळे प्रदूषण पातळी कमी होण्यास मदत होईल, अशी अपेक्षा व्यक्त केली जात आहे. यासोबतच, बनावट पीयूसी प्रमाणपत्रे देणाऱ्यांवर कठोर कारवाई करण्याचे निर्देशही मंत्र्यांनी दिले आहेत.