संगमनेरमध्ये बिबट्याच्या हल्ल्यात चिमुकला गंभीर जखमी

संगमनेर –

संगमनेरमध्ये बिबट्याचा वाढता उपद्रव पुन्हा एकदा समोर आला आहे. यामुळे नागरिकांमध्ये संतापाचे वातावरण निर्माण होत असल्याचे दिसत आहे. संगमनेर तालुक्यातील शेडगाव येथे बिबट्याने एका चार वर्षांच्या चिमुकल्यावर प्राणघातक हल्ला केला असून, त्यात तो गंभीर जखमी झाला आहे. ही घटना गुरुवारी सायंकाळी घडली.

आई, आजी आणि मामासोबत शेतात गेलेल्या श्रीधर नावाच्या मुलावर बिबट्याने अचानक हल्ला केला. मात्र, आई आणि आजीने मोठ्या हिमतीने आरडाओरडा केल्याने बिबट्याने त्याला सोडून पळ काढला.

सध्या मुलावर लोणी येथील रुग्णालयात उपचार सुरू असून, त्याची प्रकृती स्थिर असल्याचे समजते. या घटनेमुळे परिसरात बिबट्याची दहशत वाढली असून, नागरिकांनी वनविभागाकडे बिबट्याचा बंदोबस्त करण्याची मागणी केली आहे.

शेडगाव येथील सेवानिवृत्त ग्रामसेवक लहानु फड यांची सून भारती फड गुरुवारी सायंकाळी साडेपाचच्या सुमारास प्रवरा नदीच्या किनारी असलेल्या शेतात जनावरांसाठी गवत कापायला गेल्या होत्या. त्यावेळी त्यांच्यासोबत त्यांच्या आई सिंधूबाई नागरे, भाऊ शुभम नागरे आणि चार वर्षांचा मुलगा श्रीधर होता. श्रीधर जवळच खेळत असताना झुडपात दबा धरून बसलेल्या बिबट्याने अचानक त्याच्यावर हल्ला केला आणि त्याला ऊसाच्या शेतात ओढत नेले.

मुलावर हल्ला झाल्याचे पाहून आई भारती आणि आजी सिंधूबाई यांनी मोठ्या हिमतीने आरडाओरडा करत बिबट्याच्या दिशेने धाव घेतली. त्यामुळे बिबट्याने घाबरून मुलाला जागेवर सोडून दिल आणि पळून गेला. मात्र, तोपर्यंत बिबट्याने केलेल्या हल्ल्यात श्रीधरच्या मानेला गंभीर दुखापत झाली होती. तातडीने मामा शुभमने त्याला उपचारासाठी लोणी येथील प्रवरा ग्रामीण रुग्णालयात दाखल केले.

सध्या मुलावर उपचार सुरू असून, सामाजिक कार्यकर्ते राजू आंधळे यांनी दिलेल्या माहितीनुसार, त्याची प्रकृती सुधारत आहे. गेल्या काही दिवसांपासून या परिसरात बिबट्याचे हल्ले वाढले आहेत. त्यामुळे नागरिकांमध्ये भीतीचे वातावरण निर्माण झाले असून, वनविभागाने यावर त्वरित उपाययोजना करावी अशी मागणी जोर धरत आहे.