पुणे – ओबीसी नेते लक्ष्मण हाके यांनी पवारांच्या कुटुंबीयांवर आणि त्यांच्या कार्यकर्त्यांवर गंभीर आरोप केले आहे. पवार कुटुंबाने गुंड पोसलेले आहेत आणि त्याच गुंडांनी माझ्यावर जाणीवपूर्वक हल्ला केला असल्याचे त्यांनी माध्यमांशी बोलताना सांगितले.
ओबीसी आरक्षणासाठी संघर्ष करणारे नेते लक्ष्मण हाके यांच्या वाहनावर शनिवारी (२७ सप्टेंबर) अहिल्यानगर जिल्ह्यातील पाथर्डी तालुक्यात दैत्यनांदूर येथे ओबीसी एल्गार सभेसाठी जात असताना अरणगाव बाह्यवळण रस्त्यालगत अज्ञात तरुणांनी त्यांची गाडी अडविली व हल्ला केला. या हल्ल्यात हाके यांच्या गाडीच्या काचा फोडण्यात आल्या असून, वाहनाचे मोठे नुकसान झाले आहे. सुदैवाने हाके यांना कोणतीही शारीरिक इजा झालेली नाही.
या घटनेनंतर लक्ष्मण हाके यांनी पोलिसांच्या सुरक्षेमध्येही हल्ला झाल्याबद्दल चिंता व्यक्त करत पोलिसांच्या कार्यक्षमतेवर प्रश्नचिन्ह उपस्थित केले. तसेच थेट पवार कुटुंबावर आणि त्यांच्या कार्यकर्त्यांवर अत्यंत गंभीर आरोप केले आहेत. माध्यमांशी बोलताना त्यांनी हल्लेखोर गोरक्षनाथ दळवी आणि त्यांच्या सहकाऱ्यांचे फोटो शरदचंद्र पवार आणि आमदार निलेश लंके यांच्यासोबत असल्याचे सांगितले. माझी आणि या माणसांची काही वैयक्तिक दुश्मनी नाही, पण पवार कुटुंबाने असे गुंडे पोसलेले आहेत. आज त्याच गुंडानी माझ्यावर हल्ला केला.
माझ्यावर आजपर्यंत आठ-नऊ हल्ले झाले आहेत. त्यांच्यावर कारवाई होत नाही. हल्लेखोरांवर कारवाई झाली असती तर मला संरक्षण द्यायची सुद्धा गरज पडली नसती. पोलिसांचे संरक्षण असताना देखील काल माझ्यावर हल्ला झाला. या लोकांना वर्दीची भीती राहिली नसावी, असे देखील ते म्हणाले.
दरम्यान, या हल्ल्याप्रकरणी अहिल्यानगर पोलिसांनी तिघांना ताब्यात घेतले असून त्यांच्या विरोधात नगर तालुका पोलीस ठाण्यात गुन्हा नोंदविण्यात आला आहे.
