संगमनेरसाठी दीड कोटींची भेट! १८ गावांना मिळणार नवीन ट्रान्सफॉर्मर, वीज समस्या मार्गी! आमदार सत्यजीत तांबे यांच्या प्रयत्नांतून ‘जिल्हा नियोजन’ मधून मोठा निधी मंजूर

संगमनेर – संगमनेर तालुक्यातील १८ गावांतील शेतकरी आणि नागरिकांसाठी एक महत्त्वाची आणि दिलासादायक बातमी आहे. येथील वीजपुरवठा व्यवस्थेतील त्रुटी दूर करून स्थिर व अखंड वीजपुरवठा सुनिश्चित करण्याच्या दृष्टीने आमदार सत्यजीत तांबे यांच्या प्रयत्नातून तब्बल दीड कोटी रुपयांचा निधी नवीन ट्रान्सफॉर्मरसाठी मंजूर झाला आहे. ‘जिल्हा नियोजन’मधून मिळालेल्या या भरीव निधीमुळे ग्रामीण भागातील नागरिकांची आणि विशेषतः शेतकऱ्यांची दीर्घकाळापासूनची समस्या कायमस्वरूपी मार्गी लागणार आहे.

या निधीतून नवीन ट्रान्सफॉर्मर बसवण्यात येणाऱ्या १८ गावांमध्ये प्रामुख्याने अंभोरे, कुंभारवाडी, कोळवडे, घुलेवाडी, जाखोरी, जोर्वे, डिग्रस, तळेगाव, नांदुरी दुमाला, मांडवे बु., मालुंजे, रणखांब वाडी, राजापूर, वरवंडी (जनतानगर), हिवरगाव पावसा, मालुंजे आणि संगमनेर खुर्द या गावांचा समावेश आहे.

या भागात अनेक वर्षांपासून कमी वीजदाब, वारंवार खंडित होणारा वीजपुरवठा आणि त्यामुळे सिंचनात येणारे अडथळे अशा समस्या होत्या. या समस्यांमुळे शेतीचे मोठे नुकसान होत होते आणि नागरिकांनाही त्रास सहन करावा लागत होता. या समस्येवर कायमस्वरूपी तोडगा काढण्यासाठी आमदार तांबे यांनी संबंधित विभागाकडे सातत्याने पाठपुरावा केला होता. त्यांच्या याच प्रयत्नांना यश आले असून, आता नवीन ट्रान्सफॉर्मरमुळे ही समस्या पूर्णपणे संपुष्टात येणार आहे.

आमदार तांबे यांनी निधी मंजुरीबद्दल बोलताना सांगितले की, संगमनेर तालुक्यातील वीजपुरवठा अधिक सक्षम व्हावा, शेतकऱ्यांना सिंचनासाठी पुरेशी वीज उपलब्ध व्हावी आणि नागरिकांना अखंड सेवा मिळावी यासाठी आम्ही प्रयत्नशील आहोत. त्यांनी ‘जिल्हा नियोजन’मधून निधी उपलब्ध करून दिल्याबद्दल पालकमंत्री राधाकृष्ण विखे पाटील यांचेही आभार मानले.

या निर्णयामुळे संगमनेर तालुक्यातील वीज वितरण प्रणाली अधिक सक्षम होणार असून, यामुळे शेती, उद्योग आणि एकूणच ग्रामीण विकासाचा वेग अधिक वाढेल. हा निधी म्हणजे जनतेच्या समस्या ऐकून त्यावर सातत्याने पाठपुरावा करून मिळवलेला जनतेसाठीचा खरा विकास असल्याची भावना व्यक्त होत आहे.