रेकॉर्डवरील गुन्हेगाराला पोलीस ठाण्यात आणताना मोठा गोंधळ; ६ जणांविरुद्ध गुन्हा दाखल

संगमनेर: रेकॉर्डवरील एका गुन्हेगाराला पोलीस ठाण्यात घेऊन येत असताना काही व्यक्तींनी भररस्त्यात गाडी आडवी लावून पोलिसांना शिवीगाळ करत मोठा गोंधळ घातल्याची गंभीर घटना संगमनेर शहर पोलीस ठाण्यासमोर शुक्रवारी (दि. ७ नोव्हेंबर) दुपारी घडली. या प्रकरणी पोलिसांनी सहा जणांविरुद्ध भारतीय न्याय संहिता (BNS) अंतर्गत गुन्हा दाखल केला आहे.

पोलिसांकडून मिळालेल्या माहितीनुसार, पोलीस कॉन्स्टेबल रामकिसन मुखरे आणि कॉन्स्टेबल आगलावे हे रेकॉर्डवरील गुन्हेगार सागर बाळू गायकवाड याला पोलीस ठाण्यात घेऊन येत होते. यावेळी तहसील कार्यालयासमोर मोठ्या प्रमाणात वाहतूक ठप्प झाली होती. काही जणांनी त्यांची गाडी रस्त्यात आडवी उभी केल्यामुळे वाहतुकीचा खोळंबा झाला होता.

यावेळी वाहतूक सुरळीत करण्यासाठी पोलिसांनी संबंधित वाहनचालकांना गाडी बाजूला घेण्याची सूचना केली. यानंतर मनोज गायकवाड, अमोल भोसले, नितीन वाघमारे आणि त्यांच्यासोबत असलेल्या तीन महिलांनी पोलिसांना शिवीगाळ करायला सुरुवात केली. एवढेच नव्हे तर, त्यांनी पोलिसांना धमक्या देत सरकारी कामात अडथळा निर्माण केला.

आरोपींनी सरकारी कामात अडथळा आणल्याने पोलीस कॉन्स्टेबल रामकिसन मुखरे यांनी तातडीने शहर पोलीस ठाण्यात फिर्याद दिली. या फिर्यादीवरून पोलिसांनी वरील सहाही आरोपींविरुद्ध भारतीय न्याय संहिता (BNS) कलम २८१, २२१, ३५२ आणि ३५१(२) अंतर्गत गुन्हा दाखल केला आहे. या घटनेमुळे परिसरात काही काळ तणावाचे वातावरण निर्माण झाले होते. पोलीस या प्रकरणाचा अधिक तपास करत आहेत.