संगमनेर –
सुकेवाडी (संगमनेर) येथील गांजा तस्करी प्रकरणात एक मोठी अपडेट समोर आली आहे. या प्रकरणातील मुख्य आरोपी तुषार पडवळ उर्फ दमल्या याला अखेर संगमनेर पोलीस आणि नारकोटिक्स टास्क फोर्सच्या संयुक्त पथकाने अटक केली आहे.
संगमनेर शहरालगत असलेल्या सुकेवाडी परिसरात दोन दिवसांपूर्वी नाशिकच्या नारकोटिक्स टास्क फोर्सच्या पथकाने स्थानिक पोलिसांच्या मदतीने छापेमारी करत तब्बल सव्वा कोटी रुपयांचा गांजा हस्तगत केला होता. टास्क फोर्सच्या कारवाईमध्ये मोठ्या प्रमाणात गांजा पकडण्यात आल्याने स्थानिक पोलिसांचे अपयश समोर आले होते.
शहरालगत ही कारवाई करण्यात आली असून, यामध्ये तब्बल सव्वा कोटी रुपये किमतीचा ४५६ किलो गांजाचा साठा जप्त करण्यात आला. कारवाईदरम्यान मुख्य आरोपी असलेला तुषार पडवळ उर्फ दमल्या हा फरार झाला होता तर त्याच्या वडिलांना पथकाने घटनास्थळी ताब्यात घेत अटक केली होती.
दरम्यान फरार झालेल्या आरोपी तुषार पडवळ याच्या मागावर पोलीस पथके पाठविण्यात आली होती. शनिवारी सकाळी संगमनेर शहर पोलीस स्टेशन आणि अँटी नर्कोटिक टास्क फोर्स यांच्या पथकाला आरोपी तुषार पडवळ उर्फ दमल्या याला पकडण्यात यश आले आहे. पथकाने मिळालेल्या गोपनीय माहितीच्या आधारे सापळा रचून आरोपीला घुलेवाडी परिसरातून ताब्यात घेतले.
आरोपी तुषार पडवळला सध्या शहर पोलीस स्टेशनमध्ये आणण्यात आले असून, त्याच्या अटकेची कायदेशीर कार्यवाही पूर्ण केल्यानंतर त्याला न्यायालयासमोर हजर केले जाणार आहे, अशी माहिती संगमनेरचे पोलीस उपअधीक्षक डॉ. कुणाल सोनवणे यांनी दिली. मुख्य आरोपीच्या अटकेमुळे सुकेवाडी गांजा तस्करी प्रकरणाला निर्णायक वळण मिळाले असून, पोलिसांच्या पुढील तपासात काय निष्पन्न होते याकडे लक्ष लागले आहे.
सुकेवाडी गांजा तस्करी प्रकरणातील मुख्य आरोपी तुषार पडवळ उर्फ ‘दमल्या’ अखेर पोलिसांच्या जाळ्यात!
मुख्य आरोपीच्या अटकेमुळे सुकेवाडी गांजा तस्करी प्रकरणाला निर्णायक वळण मिळाले असून, पोलिसांच्या पुढील तपासात काय निष्पन्न होते याकडे लक्ष लागले आहे.
