संगमनेर | प्रतिनिधी
संगमनेर शहराच्या विकासाचा नवा रोडमॅप असलेल्या ‘संगमनेर २.०’ या जाहीरनाम्याची प्रभावी अंमलबजावणी करण्यासाठी आता प्रशासकीय स्तरावर वेगाने हालचाली सुरू झाल्या आहेत. या संकल्पनेला प्रत्यक्ष कृतीची जोड देण्यासाठी मंगळवारी संगमनेर नगरपरिषद कार्यालयात आमदार सत्यजित तांबे आणि नूतन नगराध्यक्षा डॉ. मैथिली तांबे यांच्या उपस्थितीत सर्व विभाग प्रमुखांची महत्त्वाची बैठक पार पडली. या बैठकीच्या माध्यमातून आमदार तांबे यांनी थेट ‘ॲक्शन मोड’मध्ये येत आगामी १०० दिवसांतील कामांचे नियोजन करण्यासोबतच प्रशासनाला कामाचा दर्जा आणि पारदर्शकता राखण्याचे कडक निर्देश दिले आहेत.
मिळालेल्या माहितीनुसार, या बैठकीत आमदार सत्यजित तांबे यांनी ‘संगमनेर २.०’ मधील आश्वासनांची पूर्तता करण्यावर विशेष भर दिला. प्रत्येक विभागाने आपल्या जबाबदारीच्या क्षेत्रात कोणती कामे प्राधान्याने हाती घ्यावीत आणि ती कामे ठराविक कालमर्यादेत कशी पूर्ण करता येतील, यावर सविस्तर खल करण्यात आला. विकासाची कामे केवळ कागदावर किंवा फाईल्समध्ये मर्यादित न राहता, ती वेळेत पूर्ण होऊन सर्वसामान्य नागरिकांना त्याचा प्रत्यक्ष लाभ मिळणे आवश्यक असल्याचे त्यांनी यावेळी ठणकावून सांगितले. त्यासाठीच पुढील १०० दिवसांच्या कामांचा टप्प्याटप्प्याने आढावा घेऊन त्याचे सूक्ष्म नियोजन करण्यात आले आहे.
प्रशासकीय कामकाजात शिस्त आणण्यावर भर देताना आमदार तांबे म्हणाले की, शहराचा कायापालट करत असताना कामाच्या गुणवत्तेशी कोणतीही तडजोड खपवून घेतली जाणार नाही. रस्ते, पाणीपुरवठा, स्वच्छता आणि इतर पायाभूत सुविधांची कामे करताना पारदर्शक कारभार करण्याच्या स्पष्ट सूचना त्यांनी अधिकाऱ्यांना दिल्या. विशेषतः प्रलंबित प्रकल्प मार्गी लावण्यासाठी विभागात समन्वय असणे गरजेचे असून, नागरिकांच्या तक्रारींचे निवारण तातडीने होईल याकडे लक्ष देण्याचे आदेशही त्यांनी दिले. या नियोजित विकासकामांना आता प्रशासकीय बैठकीच्या माध्यमातून प्रत्यक्ष सुरुवात झाल्याने शहराचा चेहरामोहरा बदलण्याच्या दृष्टीने एक मोठे पाऊल पडले आहे.
या महत्त्वपूर्ण बैठकीस माजी नगराध्यक्षा दुर्गाताई तांबे, नगरपरिषदेचे मुख्याधिकारी दयानंद गोरे यांच्यासह पालिकेचे सर्व विभागांचे अधिकारी आणि खातेप्रमुख उपस्थित होते. ‘संगमनेर २.०’ मुळे शहरात आधुनिक सुविधांचे जाळे निर्माण होणार असून, आमदार सत्यजित तांबे यांच्या या आक्रमक पवित्र्यामुळे प्रशासकीय यंत्रणाही आता कामाला लागली आहे.
