संगमनेरमध्ये विनापरवाना डीजे वाजवणाऱ्यावर पोलिसांची कारवाई; ‘जनता बँड’चा डीजे जप्त

संगमनेर, प्रतिनिधी – 

संगमनेर शहरात ध्वनी प्रदूषणाचे नियम धाब्यावर बसवून आणि कोणत्याही सक्षम प्राधिकरणाची पूर्वपरवानगी न घेता मोठ्या आवाजात डीजे वाजवणाऱ्या चालकावर शहर पोलिसांनी कडक कारवाई केली आहे. या कारवाईत पोलिसांनी डीजे साहित्यासह मुद्देमाल जप्त केला असून संबंधित चालकावर गुन्हा दाखल केला आहे.

शुक्रवारी (६ फेब्रुवारी) रात्री साडेदहा वाजेच्या सुमारास घुलेवाडी परिसरातील ‘अमृता लॉन्स’ येथे नियमांचे उल्लंघन करून मोठ्या आवाजात डीजे वाजत असल्याची माहिती पोलिसांना मिळाली होती. या माहितीच्या आधारे संगमनेर शहर पोलीस स्टेशनच्या पथकाने घटनास्थळी जाऊन खात्री केली असता, त्या ठिकाणी ‘जनता बँड’ मालकीचा डीजे संच कोणताही अधिकृत परवाना नसताना अत्यंत मोठ्या आवाजात वाजवला जात असल्याचे निदर्शनास आले. या आवाजामुळे सार्वजनिक शांततेचा भंग होत असल्याने पोलिसांनी तात्काळ कारवाई करत डीजे संच जप्त केला.

या प्रकरणी पोलीस कॉन्स्टेबल राहुल कैलास पांडे यांनी दिलेल्या फिर्यादीवरून डीजे चालक योगेश बन्सी लांडुगे (वय ३५ वर्षे, रा. धांदरफळ, संगमनेर) याच्यावर महाराष्ट्र पोलीस कायदा कलम ३८(१) व १३६ अन्वये गुन्हा दाखल करण्यात आला असून पोलीस पुढील तपास करत आहे.