मुंबई, विशेष प्रतिनिधी –
संगमनेर आणि सिन्नर मतदारसंघातील आरोग्य सुविधांचे प्रलंबित प्रश्न आणि सर्वसामान्यांच्या आरोग्याशी निगडित ट्रॉमा सेंटर, महिला रुग्णालय आणि प्राथमिक आरोग्य उपकेंद्रांच्या कामात होणाऱ्या तांत्रिक अडचणी आणि प्रशासकीय विलंबाबाबत आज आमदार सत्यजित तांबे यांनी आरोग्य मंत्री प्रकाश आबिटकर यांचे लक्ष वेधले. यावेळी त्यांनी प्रलंबित प्रश्नांसंदर्भात मंत्री आबिटकर यांच्याशी सविस्तर चर्चा केली.
या भेटीदरम्यान आमदार सत्यजीत तांबे यांनी प्रामुख्याने सिन्नर-वावी ग्रामीण रुग्णालयातील ट्रॉमा सेंटरचा विषय लावून धरला. २७ फेब्रुवारी २०२४ रोजी मंजूर झालेल्या या सेंटरचे काम अद्यापही सुरू न झाल्याने अपघातग्रस्तांना वेळेवर उपचार मिळत नाहीत, परिणामी अनेकांना आपले प्राण गमवावे लागत असल्याचे त्यांनी निदर्शनास आणून दिले. विशेष म्हणजे, या विषयावर आमदार तांबे यांनी २६ जुलै २०२३ च्या पावसाळी अधिवेशनापासून ते १६ जुलै २०२५ च्या अधिवेशनापर्यंत सातत्याने पाठपुरावा केला आहे. तत्कालीन आरोग्यमंत्र्यांसोबत झालेल्या बैठकीनंतरही प्रत्यक्ष कामाला सुरुवात न झाल्याने त्यांनी तीव्र नाराजी व्यक्त केली.
तसेच, ३ नोव्हेंबर २०२० रोजी संगमनेर नगरपरिषदेच्या कुटीर रुग्णालयाच्या आवारात मंजूर झालेल्या स्वतंत्र महिला रुग्णालयाबाबत अद्याप कोणतीही कार्यवाही झालेली नाही. हे रुग्णालय तातडीने सुरू करण्याची मागणी करतानाच, मौजे खांडगाव (ता. संगमनेर) येथे जागा उपलब्ध असूनही रखडलेल्या प्राथमिक आरोग्य उपकेंद्राच्या कामाबाबतही त्यांनी चर्चा केली. ग्रामीण भागातील महिला, लहान मुले आणि ज्येष्ठ नागरिकांना उपचारांसाठी शहरात धाव घ्यावी लागत असल्याने हे प्रकल्प प्राधान्याने पूर्ण होणे गरजेचे असल्याचे तांबे यांनी सांगितले.
यावेळी महात्मा फुले जन आरोग्य योजनेच्या अंमलबजावणीत येणाऱ्या त्रुटी आणि रुग्णालय स्तरावर लाभार्थ्यांना होणाऱ्या त्रासावरही सविस्तर चर्चा करण्यात आली. आमदार सत्यजीत तांबे यांनी मांडलेल्या या सर्व मागण्यांची दखल घेत, आरोग्य मंत्री प्रकाश आबिटकर यांनी सकारात्मक प्रतिसाद दिला असून यावर तातडीने प्रशासकीय कार्यवाही करण्याचे आश्वासन दिले आहे.
नागरिकांच्या आरोग्य सेवेसंदर्भातील प्रत्येक प्रश्न सुटेपर्यंत आपला हा लढा आणि पाठपुरावा सुरूच राहील, असा ठाम विश्वास आमदार सत्यजीत तांबे यांनी व्यक्त केला आहे.
आरोग्य प्रश्नी सत्यजीत तांबे ‘ॲक्शन मोड’वर; आरोग्यमंत्र्यांकडे प्रलंबित कामांचा केला पाठपुरावा!
नागरिकांच्या आरोग्य सेवेसंदर्भातील प्रत्येक प्रश्न सुटेपर्यंत आपला हा लढा आणि पाठपुरावा सुरूच राहील, असा ठाम विश्वास आमदार सत्यजीत तांबे यांनी व्यक्त केला आहे.
