महाराष्ट्र संवाद न्यूज ऑनलाईन
अहिल्यानगर :
पाथर्डी शहरातील माणिकदौंडी चौक परिसरात मध्यरात्रीच्या सुमारास गावठी कट्ट्याचा धाक दाखवून एका युवकाला मारहाण करत त्याची दुचाकी आणि रोकड लुटणाऱ्या दरोडेखोरांना पाथर्डी पोलिसांनी तातडीने बेड्या ठोकल्या आहेत. या धाडसी कारवाईत पोलिसांनी पाचपैकी तिघा आरोपींना अटक केली असून, यामध्ये दोन अल्पवयीन मुलांचा समावेश आहे. फरार असलेल्या इतर दोन आरोपींचा शोध पोलीस घेत आहेत.
या घटनेबाबत सविस्तर माहिती अशी की, माणिकदौंडी चौक परिसरातील फ्लेक्स व्यावसायिक अमिर हबिब शेख हे २२ फेब्रुवारी रोजी मध्यरात्री साडेबाराच्या सुमारास बॅनर लावण्यासाठी घराबाहेर पडले असता, त्यांच्या दुचाकीची वायर तोडत असलेल्या पाच संशयितांना त्यांनी हटकले. यावेळी आरोपींनी शेख यांना लाथाबुक्क्यांनी बेदम मारहाण केली.
इतक्यावरच न थांबता एका आरोपीने कंबरलेला गावठी कट्टा काढून शेख यांच्या डोक्याला लावत गोळी झाडण्याची धमकी दिली. या दहशतीखाली शेख यांच्याकडून ६५० रुपयांची रोकड आणि त्यांची दुचाकी हिसकावून आरोपी पसार झाले.
घटनेचे गांभीर्य ओळखून पोलीस निरीक्षक विलास पुजारी यांच्या मार्गदर्शनाखाली उपनिरीक्षक विलास जाधव व त्यांच्या पथकाने तातडीने तपासाची चक्रे फिरवली. पोलिसांनी अनिकेत शामवेल शिंदे (वय २२, रा. देहूरोड, पुणे) याच्यासह दोन अल्पवयीन मुलांना ताब्यात घेतले.
अटक केलेल्या आरोपींकडून पोलिसांनी एक गावठी कट्टा, दोन जिवंत काडतुसे आणि चोरीच्या दोन दुचाकी हस्तगत केल्या आहेत. तपासात आरोपींनी गुन्ह्यासाठी वापरलेली पल्सर गाडी देखील चोरीची असल्याचे निष्पन्न झाले आहे.
ही कारवाई जिल्हा पोलीस अधीक्षक सोमनाथ घार्गे, अपर पोलीस अधीक्षक कल्लूबर्मे आणि उपविभागीय पोलीस अधिकारी नीरज राजगुरू यांच्या मार्गदर्शनाखाली पाथर्डी पोलिसांनी यशस्वीरित्या पार पाडली. न्यायालयाने सज्ञान आरोपीला तीन दिवसांची पोलीस कोठडी सुनावली.
