अर्धन्यायिक सुनावणी संपवून बाहेर आला अन् चहाच्या टपरीवर लाच घेताना ACB च्या जाळ्यात तहसीलचा लिपिक अडकला, आठवडाभरात दुसरी मोठी कारवाई

संगमनेर, प्रतिनिधी –
संगमनेरच्या तहसील कार्यालयातील लिपिक कैलास विठ्ठल खाडे (रा. अकोले) याला १३ हजार रुपयांची लाच स्वीकारताना अहिल्यानगरच्या लाचलुचपत प्रतिबंधक विभागाने (ACB) गुरुवारी रंगेहात पकडले. अवघ्या आठवडाभरात महसूल विभागात झालेली ही दुसरी मोठी कारवाई असल्याने जिल्ह्यात खळबळ माजली आहे.
समजलेल्या माहितीनुसार, एका तक्रारदाराला त्यांच्या मालमत्तेचा वाटप पत्राचा आदेश करून हवा होता. यासाठी आवश्यक असलेली सर्व कायदेशीर कागदपत्रे पूर्ण असतानाही, लिपिक कैलास खाडे याने या कामासाठी १३ हजार रुपयांच्या लाचेची मागणी केली होती. तक्रारदाराने वारंवार विनंती करूनही खाडे लाचेच्या मागणीवर ठाम होता. अखेर कंटाळून तक्रारदाराने लाचलुचपत प्रतिबंधक विभागाकडे धाव घेतली.
तक्रारीची शहानिशा केल्यानंतर, गुरुवारी २६ फेब्रुवारी २०२६ रोजी दुपारी ४ वाजेच्या सुमारास तहसील कार्यालयाच्या परिसरात सापळा रचण्यात आला. दरम्यान तहसील कार्यालयामध्ये १५५ अन्वये अर्धन्यायिक सुनावणीचे काम आटोपून बाहेर आलेल्या लाचखोर लिपिक खाडे याने एका चहाच्या टपरीवर तक्रारदाराकडून लाचेची रक्कम स्वीकारली. पैसे मोजत असतानाच दबा धरून बसलेल्या एसीबीच्या पथकाने त्याला बेड्या ठोकल्या.
या कारवाईनंतर स्थानिक नागरिकांनी समाधान व्यक्त केले आहे. आरोपी खाडे यापूर्वी अकोले तहसीलमध्ये कार्यरत असतानाही त्याच्याबाबत तक्रारी होत्या, अशी माहिती समोर येत आहे. संगमनेरमध्ये गेल्या काही दिवसांपासून महसूल विभागातील भ्रष्टाचाराच्या घटनांमध्ये वाढ झाली असून, काही दिवसांपूर्वीच एका तलाठ्यावरही कारवाई झाली होती. वारंवार होणाऱ्या या कारवायांमुळे संगमनेर महसूल विभागाची प्रतिमा मलीन होत असून, जिल्हाधिकाऱ्यांनी या प्रकरणाची गंभीर दखल घेऊन कडक पावले उचलावीत, अशी मागणी आता जोर धरू लागली आहे. याप्रकरणी आता गुन्हा दाखल करण्याची प्रक्रिया सुरू आहे.