आमदार सत्यजीत तांबे यांच्या पाठपुराव्याला यश; संगमनेरमध्ये सार्वजनिक शौचालयांसाठी १.५० कोटींचा निधी मंजूर

संगमनेर, प्रतिनिधी-
संगमनेर शहरातील स्वच्छता आणि सार्वजनिक आरोग्य व्यवस्था अधिक बळकट करण्याच्या दृष्टीने एक महत्त्वपूर्ण पाऊल उचलण्यात आले आहे. स्वच्छ भारत मिशन (शहरी) २.० अंतर्गत संगमनेर नगरपालिका हद्दीत सार्वजनिक शौचालयांच्या बांधकामासाठी सुमारे १ कोटी ५० लाख रुपयांच्या निधीला शासनाकडून मंजुरी देण्यात आली आहे. अशी माहिती नगराध्यक्ष डॉ. मैथिली तांबे यांनी दिली.
तांबे यांनी दिलेल्या माहितीनुसार यासंदर्भातील शासन निर्णय नुकताच निर्गमित करण्यात आला असून, आमदार सत्यजीत तांबे यांनी शासनाकडे केलेल्या सातत्यपूर्ण पाठपुराव्याला या निमित्ताने मोठे यश मिळाले आहे.
आमदार तांबे यांनी २ फेब्रुवारी रोजी या निधीसाठी विशेष मागणी केली होती. शहरातील वाढती लोकसंख्या आणि प्रवाशांची वर्दळ लक्षात घेता स्वच्छतेच्या सुविधा वाढवणे आवश्यक असल्याचे त्यांनी निदर्शनास आणून दिले होते.
त्याचबरोबर संगमनेर नगरपरिषदेच्या माध्यमातून नगराध्यक्षा डॉ. मैथिली तांबे यांनी शहरातील सहा अत्यंत महत्त्वाच्या ठिकाणी सुसज्ज सार्वजनिक शौचालये उभारण्याचा सविस्तर प्रस्ताव स्वच्छ भारत मिशन अंतर्गत सादर केला होता.
या प्रस्तावाचा सकारात्मक विचार करून राज्यस्तरीय तांत्रिक समितीने या आराखड्यास मान्यता दिली. मंजूर निधीपैकी केंद्र व राज्य शासनाच्या हिस्स्याचा ४० टक्के निधी पहिल्या हप्त्याच्या स्वरूपात त्वरित वितरित करण्याचे आदेशही देण्यात आले आहेत.
संगमनेर शहराची स्थानिक लोकसंख्या ८५ हजारांच्या आसपास असली, तरी व्यवसायानिमित्त आणि कामानिमित्त शहरात दररोज २० ते २५ हजार नागरिक बाहेरून येत असतात. या फ्लोटिंग लोकसंख्येमुळे शहरात रोज सव्वा लाखांहून अधिक लोकांचा वावर असतो, परिणामी सार्वजनिक स्वच्छतेचा प्रश्न गंभीर बनत चालला होता. प्रस्तावित नवीन शौचालयांमध्ये पुरुष आणि महिलांसाठी स्वतंत्र, सुरक्षित आणि आधुनिक सुविधांची व्यवस्था केली जाणार आहे. या प्रकल्पामुळे शहरातील सार्वजनिक आरोग्याचा दर्जा उंचावण्यास मदत होणार असून पर्यावरणाचे रक्षण आणि नागरिकांच्या जीवनमानात सकारात्मक बदल घडवून आणण्यासाठी हे पाऊल मैलाचा दगड ठरणार आहे.

📌 संगमनेर शहर स्वच्छ आणि सुंदर ठेवण्यासाठी आम्ही कटिबद्ध आहोत. दररोज शहरात येणाऱ्या हजारो नागरिकांची गैरसोय टाळण्यासाठी आधुनिक स्वच्छता सुविधांची नितांत गरज होती. आमदार सत्यजीत तांबे यांच्या मार्गदर्शनाखाली आम्ही हा प्रस्ताव सादर केला होता, याला आता मंजुरी मिळाली आहे. या निधीतून उभारली जाणारी शौचालये महिला आणि पुरुषांच्या सुरक्षिततेचा विचार करून अत्याधुनिक पद्धतीने बांधली जातील, यामुळे शहराच्या सार्वजनिक आरोग्यात मोठी सुधारणा होईल. — डॉ. मैथिली तांबे, नगराध्यक्ष.