संगमनेरमध्ये एकतर्फी प्रेमातून तरुणीवर प्राणघातक हल्ला; आरोपीचा स्वतःला संपवण्याचा प्रयत्न

संगमनेर, प्रतिनिधी- 
तालुक्यातील रणखांब येथे एकतर्फी प्रेमातून एका २१ वर्षीय तरुणीवर चाकूने सपासप वार करून तिला जीवे मारण्याचा प्रयत्न झाल्याची धक्कादायक घटना समोर आली आहे. या घटनेमुळे संपूर्ण तालुक्यात खळबळ उडाली असून, आरोपी तरुणाने स्वतःवरही हल्ला करत शेततळ्यात उडी घेऊन आत्महत्येचा प्रयत्न केला आहे.
जनार्दन गोरक्ष साळवे (वय २८, रा. पिंपरणे) असे या माथेफिरू आरोपीचे नाव असून, घारगाव पोलीस ठाण्यात त्याच्यावर गुन्हा दाखल करण्याची प्रक्रिया सुरू करण्यात आली आहे.
मिळालेल्या माहितीनुसार, आरोपी जनार्दन हा पीडित तरुणीचा नात्याने चुलत मेहुणा लागतो. त्याचे या तरुणीवर गेल्या काही दिवसांपासून एकतर्फी प्रेम होते. पीडित मुलगी पिंपरणे येथे आपल्या बहिणीला भेटण्यासाठी गेली असताना आरोपीची तिच्यावर वाकडी नजर पडली होती. गेल्या आठ दिवसांपासून तो तिच्यावर प्रेमविवाह करण्यासाठी सतत दबाव टाकत होता. मात्र तरुणीने त्यास नकार दिल्याने तो वैफल्यग्रस्त झाला होता. रविवारी सायंकाळी ही तरुणी पिंपरणे येथून आपल्या मूळ गावी रणखांब येथे परतली होती.
सोमवारी सकाळी ही तरुणी आपल्या घरी जेवण करत असताना, आरोपी जनार्दन साळवे तिथे पोहचला. त्याने रागाच्या भरात चाकूने तरुणीवर सपासप वार केले. या भीषण हल्ल्यात तरुणी रक्ताच्या थारोळ्यात कोसळली. घरातील नातेवाईकांनी आरडाओरड केल्यावर पकडले जाण्याच्या भीतीने आरोपीने स्वतःवरही चाकूने वार करून घेतले आणि तो तिथून पळू लागला. ग्रामस्थांनी त्याचा पाठलाग सुरू केल्याचे पाहून त्याने शेजारच्या एका शेततळ्यात उडी घेतली.
घटनेचे गांभीर्य ओळखून पोलीस पाटील साहेबराव बारवे, सरपंच बाबाजी गुळवे यांच्यासह नाना गुळवे, किरण गुळवे, राहुल शेजवळ आणि इतर ग्रामस्थांनी तातडीने घारगाव पोलिसांना माहिती दिली. सहाय्यक पोलीस निरीक्षक हेमंत थोरात यांनी तात्काळ पोलीस पथकासह घटनास्थळी धाव घेत जखमी तरुणी आणि आरोपीला उपचारासाठी संगमनेर येथील खाजगी रुग्णालयात दाखल केले.
सध्या घटनास्थळी फॉरेन्सिक टीम दाखल झाली असून पुराव्यांची तपासणी सुरू आहे. या क्रूर हल्ल्यामुळे रणखांब ग्रामस्थांमध्ये संतापाची लाट असून आरोपीवर कठोर कारवाई करण्याची मागणी करण्यात येत आहे.