महाराष्ट्र संवाद न्यूज ऑनलाईन, पुणे:
पुण्यातील चंदननगर भागात एका तरुणाने प्रेमप्रकरणातील वादातून २२ वर्षीय तरुणीचा ब्लेडने गळा चिरून खून करण्याचा प्रयत्न केल्याची खळबळजनक घटना उघडकीस आली आहे. उजालादेवी जसवंतसिंग दोहरे असे जखमी तरुणीचे नाव असून, तिची प्रकृती सध्या अत्यंत चिंताजनक आहे.
याप्रकरणी तरुणीचा भाऊ भगतसिंग दोहरे याने चंदननगर पोलीस ठाण्यात फिर्याद दिली असून पोलिसांनी आरोपीविरुद्ध गुन्हा दाखल केला आहे.
मिळालेल्या माहितीनुसार, पीडित तरुणी आणि आरोपी हे दोघेही नगर रस्त्यावरील एका मॉलमध्ये एकत्र काम करत होते. त्यांच्यात गेल्या काही काळापासून प्रेमसंबंध होते, मात्र अलीकडे त्यांच्यात खटके उडत होते. बुधवारी, २९ एप्रिल रोजी तरुणी घरात एकटी असल्याचे पाहून आरोपीने पठारे वस्ती येथील तिच्या घरात प्रवेश केला. तेथे झालेल्या वादानंतर आरोपीने तिच्या गळ्यावर ब्लेडने वार केले आणि तो घटनास्थळावरून पसार झाला.
रक्ताच्या थारोळ्यात पडलेल्या उजालादेवीने तातडीने आपल्या भावाला फोन करून घरी बोलावले. सुरुवातीला तिला ससून रुग्णालयात नेण्यात आले, मात्र प्रकृती अधिक बिघडल्याने तिला खासगी रुग्णालयातील अतिदक्षता विभागात हलवण्यात आले आहे. गळ्याला गंभीर जखम झाल्यामुळे तिला बोलता येत नव्हते, मात्र तिने कागद आणि पेन मागवून घेत त्यावर आरोपीचे नाव लिहून पोलिसांना माहिती दिली.
पोलीस उपायुक्त सोमय मुंडे आणि वरिष्ठ पोलीस निरीक्षक नीलेश बडाख यांनी घटनास्थळाची पाहणी केली असून, फरार आरोपीचा शोध घेण्यासाठी पोलिसांची पथके रवाना करण्यात आली आहेत.
