शिंदेसेनेची अहिल्यानगर जिल्हा कार्यकारिणी तडकाफडकी बरखास्त; उदय सामंत यांचा मोठा निर्णय

शिर्डी:
शिंदेसेनेच्या अहिल्यानगर जिल्हा कार्यकारिणीमध्ये वाढत्या तक्रारी आणि संघटनात्मक त्रुटींची दखल घेत, जिल्हा संपर्क मंत्री उदय सामंत यांनी संपूर्ण कार्यकारिणी तडकाफडकी बरखास्त करण्याचा मोठा निर्णय घेतला आहे. शिर्डी येथे आयोजित आढावा बैठकीत हा निर्णय घेण्यात आला असून, लवकरच नव्या जोमाने काम करणारी नवीन कार्यकारिणी जाहीर केली जाणार असल्याचे सामंत यांनी स्पष्ट केले.
जिल्ह्यातील पदाधिकारी आणि कार्यकर्त्यांमधील वाढते मतभेद, संघटनात्मक कामातील मरगळ आणि तक्रारींचा ओघ पाहता हा टोकाचा निर्णय घेण्यात आला आहे. शिर्डी येथे झालेल्या या महत्त्वपूर्ण बैठकीत संगमनेर, शिर्डी, राहुरी, नेवासा आणि श्रीरामपूर या तालुक्यांमधील संघटनात्मक कामकाजाचा सविस्तर आढावा घेण्यात आला.
यावेळी सामंत यांनी जिल्हा संघटनेची दक्षिण व उत्तर अशा दोन्ही विभागांतील कार्यकारिणी विसर्जित केली. मात्र, नवीन निवडी होईपर्यंत प्रभारी जिल्हाप्रमुख म्हणून नितीनराव औताडे, कमलाकर कोते, बाबुशेठ टायरवाले आणि अनिल शिंदे यांच्यावर दिलेली जबाबदारी कायम ठेवण्यात आली आहे.
आगामी निवडणुकांच्या पार्श्वभूमीवर संघटना अधिक मजबूत करण्यासाठी आणि कामात वेग आणण्यासाठी युवासेना, महिला आघाडी, शहर व ग्रामीण अशा सर्वच आघाड्यांची नव्याने फेररचना करण्याचे निर्देश उदय सामंत यांनी दिले आहेत.
सामंत यांनी शिर्डीत साईबाबांचे दर्शन घेऊन या दौऱ्याची सुरुवात केली असून, अहिल्यानगर आणि नाशिक जिल्ह्याची जबाबदारी त्यांच्याकडे असल्याने आगामी काळात त्यांचे हे दौरे पक्षासाठी अत्यंत महत्त्वाचे मानले जात आहेत.
या बैठकीला आमदार अमोल खताळ, माजी खासदार सदाशिव लोखंडे, माजी आमदार भानुदास मुरकुटे, माजी आमदार भाऊसाहेब कांबळे, शिवसेना नेते सागर बेग, जिल्हाध्यक्ष नितीन औताडे आणि प्रवक्ते संजीव भोर यांच्यासह मोठ्या संख्येने पदाधिकारी व कार्यकर्ते उपस्थित होते.