खाणीत बुडून दोन सख्ख्या भावांचा अंत; मुंबईहून परतताच बाळासाहेब थोरातांनी गाठले तिगाव, सानप कुटुंबाचे केले सांत्वन

महाराष्ट्र संवाद न्यूज ऑनलाईन, संगमनेर:

तिगाव येथील दगडाच्या खाणीत साचलेल्या पाण्यात पोहण्यासाठी गेलेल्या दोन सख्ख्या भावांचा पाण्यात बुडून दुर्दैवी मृत्यू झाल्याची धक्कादायक घटना घडली आहे. या भीषण दुर्घटनेची माहिती मिळताच महाराष्ट्राचे ज्येष्ठ नेते आणि माजी महसूल व कृषिमंत्री बाळासाहेब थोरात यांनी तीव्र दुःख व्यक्त केले. आपला मुंबई दौरा आटोपून परतताच त्यांनी थेट तिगाव येथे धाव घेतली. कुटुंबप्रमुख या नात्याने त्यांनी मृत मुलांच्या मातोश्री मनीषा सानप व त्यांच्या कुटुंबीयांची भेट घेऊन त्यांचे सांत्वन केले.

महेश गोरखनाथ सानप (वय १८) आणि ओंकार गोरखनाथ सानप (वय १४) या मृत पावलेल्या दोन तरुण मुलांचा अशा प्रकारे अचानक झालेला अंत पाहून बाळासाहेब थोरात स्वतः भावूक झाले होते. त्यांनी सानप कुटुंबाला धीर देत, या कठीण काळात संपूर्ण तालुका आणि ग्रामस्थ तुमच्या पाठीशी खंबीरपणे उभे राहतील, अशी ग्वाही दिली.

पोहताना पाण्याचा अंदाज न आल्यामुळे ही मोठी दुर्घटना घडली असून, भविष्यात अशा निष्पाप जीवांचे बळी जाऊ नयेत यासाठी सर्वांनीच आवश्यक ती काळजी घेणे अत्यंत गरजेचे असल्याचे आवाहन थोरात यांनी यावेळी केले. तसेच, त्यांनी सानप कुटुंबाला तातडीने शासकीय मदत मिळवून देण्यासाठी घटनास्थळावरूनच महसूल आणि कृषी विभागाच्या वरिष्ठ अधिकाऱ्यांना फोन लावला. या पीडित कुटुंबाला शासनाच्या नियमांनुसार जास्तीत जास्त आणि तातडीने आर्थिक मदत सुपूर्द करण्याचे कडक निर्देश त्यांनी प्रशासनाला दिले.

या हृदयद्रावक घटनेमुळे संपूर्ण संगमनेर तालुक्यात तीव्र हळहळ व्यक्त होत असून, अवघ्या एक वर्षापूर्वीच वडिलांचे छत्र हरपलेल्या या सानप कुटुंबावर आता दुःखाचा डोंगर कोसळला आहे.

या सांत्वन भेटीच्या वेळी तिगावचे सरपंच ज्ञानेश्वर सानप, शेतकी संघाचे संचालक सचिन दिघे, डॉ. संदीप गोरडे, अनिल कांदळकर, वाल्मीक सानप, छबुराव सानप, नामदेव सानप, प्रभाकर कांदळकर, प्रकाश सानप, संजय सानप, योगेश सानप, विशाल सानप यांच्यासह गावातील अनेक आजी-माजी पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.