महाराष्ट्र संवाद न्यूज ऑनलाईन संगमनेर: अयोध्येतील भव्य श्री राम मंदिरामध्ये भाविकांनी अर्पण केलेल्या दानाची मोठ्या प्रमाणावर चोरी (अपहार) झाल्याचे प्रकरण समोर आल्यानंतर याचे पडसाद उमटत आहेत. या गंभीर गुन्ह्याची दखल घेत संगमनेर येथील सकल हिंदू समाजाच्या वतीने शहर पोलीस स्टेशनचे पोलीस निरीक्षक यांना एक अधिकृत निवेदन सादर करण्यात आले असून, याप्रकरणी संगमनेरमध्ये ‘झिरो एफआयआर’ नोंदवण्याची मागणी करण्यात आली आहे.
अयोध्येतील राम जन्मभूमी पोलीस ठाण्यात २५ जून २०२६ रोजी या दान चोरीप्रकरणी एफआयआर क्रमांक ९०/२०२६ अन्वये आधीच गुन्हा दाखल करण्यात आला असून, सध्या विशेष तपास पथकाद्वारे या प्रकरणाचा सखोल तपास सुरू आहे. मात्र, हा गुन्हा केवळ अयोध्येपुरता मर्यादित नसून यामुळे संपूर्ण देशातील व महाराष्ट्रातील कोट्यवधी रामभक्तांच्या आणि हिंदू भाविकांच्या धार्मिक भावना अत्यंत दुखावल्या गेल्याचे निवेदनात म्हटले आहे.
माननीय सर्वोच्च न्यायालयाच्या मार्गदर्शक तत्त्वांचा आणि फौजदारी प्रक्रिया संहितेच्या तरतुदींचा आधार देत, दखलपात्र गुन्ह्यासाठी नागरिक देशातील कोणत्याही पोलीस ठाण्यात तक्रार करू शकतात, असे निवेदनात स्पष्ट करण्यात आले आहे. या प्रकरणाचे गांभीर्य लक्षात घेऊन संगमनेर शहर पोलीस ठाण्यात तात्काळ ‘झिरो एफआयआर’ नोंदवून घ्यावी आणि हा गुन्हा पुढील अधिकृत कायदेशीर तपासासाठी उत्तर प्रदेशातील संबंधित राम जन्मभूमी पोलीस स्टेशनकडे वर्ग करण्यात यावा, अशी आग्रही मागणी संगमनेरमधील नागरिकांनी केली आहे.
या निवेदनावर अरुण चव्हाण, राम अरगडे, ओंकार बिडवे, रामेश्वर पानसरे, अमोल शेलकर, डॉ. विजय पवार, ॲड. अनिल गोडसे, प्रकाश कडलग, ॲड. अमोल घुले यांच्यासह सकल हिंदू समाजाच्या व इतर अनेक कार्यकर्त्यांनी ही मागणी केली आहे. या प्रकरणी पोलीस आता काय पावले उचलतात, याकडे संपूर्ण तालुक्याचे लक्ष लागले आहे.
