ही सभा मंगळवारी, (२ जून) दुपारी बारा वाजता शिर्डी येथील एअरपोर्ट रोडवरील ‘साई किमया गार्डन लॉन्स’ येथे पार पडणार आहे. या सभेला माजी खासदार चंद्रकांत खैरे, विधान परिषद विरोधी पक्षनेते अंबादास दानवे, खासदार भाऊसाहेब वाकचौरे आणि वरळीचे आमदार सुनील शिंदे यांच्यासह शिवसेनेचे अनेक प्रमुख नेते उपस्थित राहून मार्गदर्शन करणार आहेत. राज्यातील सध्याच्या वेगवान राजकीय घडामोडी, पक्षाची आगामी वाटचाल आणि संघटन बळकटीकरण यावर खासदार संजय राऊत या सभेतून कडाडणार असल्याने संपूर्ण जिल्ह्याचे लक्ष या सभेकडे लागले आहे.
या भव्य जाहीर सभेच्या पार्श्वभूमीवर शिर्डी आणि उत्तर नगर जिल्ह्यातील शिवसैनिकांमध्ये प्रचंड उत्साह पाहायला मिळत आहे. या ऐतिहासिक सभेसाठी उत्तर नगर जिल्ह्यातील, विशेषतः शिर्डी परिसरातील तमाम निष्ठावान शिवसैनिकांनी, नागरिकांनी आणि भगवाप्रेमींनी मोठ्या संख्येने उपस्थित राहावे, असे जाहीर आवाहन शिवसेना उपजिल्हाप्रमुख अमर कतारी आणि शहरप्रमुख अमित चव्हाण यांनी केले आहे. शिवसेनेच्या सर्व अंगीकृत संघटनांचे पदाधिकारी, कार्यकर्ते आणि स्वाभिमानी शिवसैनिकांनी या सभेला उपस्थित राहून शिवसेनेची ताकद दाखवून द्यावी, असेही कतारी आणि चव्हाण यांनी शेवटी म्हटले आहे.
