लाडकी बहीण योजना की समाज कल्याणच्या निधीवर ‘डल्ला’? उत्कर्षा रूपवते यांचा सरकारवर घणाघाती आरोप

महाराष्ट्र संवाद न्यूज ऑनलाईन
मुंबई | विशेष प्रतिनिधी:
राज्यात बहुचर्चित असलेल्या ‘मुख्यमंत्री लाडकी बहीण योजने’वरून आता राजकीय वातावरण चांगलेच तापू लागले आहे. वंचित बहुजन आघाडीच्या राज्य प्रवक्त्या उत्कर्षाताई रूपवते यांनी महायुती सरकारच्या आर्थिक नियोजनावर आणि या योजनेच्या निधी वाटपावर तीव्र शब्दांत आक्षेप घेतला आहे. लाडकी बहीण योजना सुरू ठेवण्यासाठी शासनाने समाज कल्याण विभागाचा कोट्यवधी रुपयांचा निधी वळवल्याचा गंभीर आरोप त्यांनी केला असून सरकारच्या या कारभाराचा जाहीर निषेध केला आहे.
उत्कर्षाताई रूपवते यांनी सरकारवर टीका करताना म्हटले आहे की, मुख्यमंत्री लाडकी बहीण योजनेसाठी समाज कल्याण विभागाचे तब्बल ३४४.७४ कोटी रुपये एका शासन निर्णयाच्या (जीआर) माध्यमातून लुबाडण्यात आले आहेत. ही केवळ निधीची पळवापळवी नसून एक प्रकारे अनुसूचित जातीसाठी राखीव असलेल्या हक्काच्या पैशांवर डल्ला मारण्याचा प्रकार आहे. ही योजना कशीतरी जिवंत ठेवण्यासाठी सरकारकडून सातत्याने समाज कल्याण विभागाचा, विशेषतः दलित आणि वंचित घटकांच्या कल्याणासाठी असलेला निधी दुसरीकडे वळवला जात आहे, जो अत्यंत निंदनीय आहे.
समाज कल्याण विभागाच्या मूळ योजनांचे काय होणार, असा सवाल उपस्थित करत रूपवते यांनी प्रशासकीय ढिसाळपणावर बोट ठेवले. सरकारने समाज कल्याण विभागाच्या अंतर्गत येणाऱ्या विद्यार्थ्यांच्या स्कॉलरशिप, घरकुल योजना आणि इतर कल्याणकारी योजना पुढे कशा चालवायच्या, याचे कोणतेही ठोस नियोजन केलेले नाही. या योजनांचे भवितव्य वाऱ्यावर सोडून केवळ लाडकी बहीण योजना कशी सुरू राहील, यासाठीच सरकारची धडपड सुरू आहे. अशा पद्धतीने निधी वळवल्यामुळे मागासवर्गीय समाजाच्या विकासाला मोठा खिळ बसेल आणि या विभागाच्या योजना बंद पडण्याच्या मार्गावर येतील, अशी भीती त्यांनी व्यक्त केली.
यावेळी त्यांनी राज्याच्या वाढत्या कर्जाचा मुद्दा उपस्थित करत थेट अर्थमंत्रालयावर निशाणा साधला. महाराष्ट्र सरकारवर आज ११ लाख कोटी रुपयांपेक्षा जास्त कर्ज आहे. राज्याची आर्थिक स्थिती एवढी गंभीर असताना, कोणतेही आर्थिक नियोजन न करता केवळ राजकीय फायद्यासाठी लाडकी बहीण योजनेसाठी पैसे लुबाडण्याची सवय सरकारला लागली आहे, असा घणाघात त्यांनी केला. या सरकारमध्ये समाज कल्याण खाते शिवसेनेकडे (शिंदे गट) असतानाही मुख्यमंत्री, उपमुख्यमंत्री किंवा संबंधित मंत्री यावर काहीच बोलत नाहीत, याबद्दल त्यांनी आश्चर्य व्यक्त केले.
वंचित बहुजन आघाडीचा लाडकी बहीण योजनेला विरोध नाही, ही योजना सुरूच राहिली पाहिजे, अशी भूमिका उत्कर्षाताई रूपवते यांनी स्पष्ट केली. मात्र, त्यासाठीचे आर्थिक नियोजन करण्यात महायुती सरकार पूर्णपणे अपयशी ठरले आहे. विशेषतः अर्थखाते सांभाळणारे उपमुख्यमंत्री देवेंद्र फडणवीस यांनी आपली चूक कबूल करून यामध्ये तातडीने सुधारणा करावी, अशी मागणी त्यांनी केली आहे. अन्यथा हक्काचा निधी हिरावून घेतल्याप्रकरणी वंचित बहुजन आघाडी रस्त्यावर उतरून जाब विचारेल, असा इशाराही त्यांनी दिला आहे.