रामराज्य शस्त्राने नव्हे, तर संस्कार आणि सदाचाराने येते: रामायणाचार्य ढोक महाराज

महाराष्ट्र संवाद न्यूज ऑनलाईन
संगमनेर:
रामराज्य हे केवळ शस्त्राच्या बळावर उभे राहत नसून, त्यासाठी शास्त्र, संस्कार आणि सदाचाराचा भक्कम आधार आवश्यक असतो. तसेच कोणतेही धर्मकार्य यशस्वी करण्यासाठी माणसाकडे दृढ इच्छाशक्ती असणे गरजेचे आहे, असे प्रतिपादन प्रसिद्ध रामायणाचार्य ढोक महाराज यांनी केले आहे.
गुंजाळवाडी येथे आयोजित परमपूज्य गगनगिरी महाराज अखंड हरिनाम सप्ताहातील रामकथेच्या समारोप प्रसंगी ते बोलत होते. सुमारे सात लाख भाविकांनी या ज्ञानयज्ञाचा लाभ घेतला असल्याचे संयोजकांनी म्हटले आहे, कथेच्या सांगतेनंतर महाप्रसादासाठी भाविकांची अलोट गर्दी झाली होती.
अधिक मासातील आठव्या पर्वाचे औचित्य साधून आयोजित या रामकथेच्या अंतिम सत्रात ढोक महाराजांनी आपल्या मधुर आणि ओजस्वी वाणीतून रामायणातील युद्धकांड आणि रामराज्य स्थापनेचे अत्यंत प्रभावी निरूपण केले. रामायणाचा खरा आदर्श हा बंधुभावात दडलेला असून गुरूमिलन, मातृभक्ती, त्याग आणि कर्तव्यनिष्ठा हीच रामायणाची खरी शिकवण आहे, असेही त्यांनी यावेळी स्पष्ट केले.
नल-नील यांनी रामनामाच्या सामर्थ्याने केवळ पाच दिवसांत समुद्रावर शंभर योजनांचा सेतू कसा उभारला आणि प्रभू रामांनी ज्या ठिकाणी शिवलिंगाची स्थापना केली, तेच आजचे रामेश्वरम कसे बनले, याचा इतिहास त्यांनी श्रोत्यांसमोर मांडला.
युद्धकांडाचे विवेचन करताना त्यांनी अंगदशिष्टाई, लक्ष्मण मूर्च्छा, संजीवनी बुटीचे महत्त्व आणि हनुमान-भरत भेट या प्रसंगांचे जिवंत वर्णन केले. प्रभू रामांनी रावणाचा वध करून लंकेचे राज्य बिभीषणाला बहाल केल्याचा प्रसंग सांगताना संपूर्ण सभागृह भारावून गेले होते. चौदा वर्षांच्या वनवासानंतर अयोध्येत परतलेल्या प्रभू रामांचा राज्याभिषेक हा धर्म, न्याय आणि लोककल्याणाचा विजय होता, असे सांगत त्यांनी कथेचा भावपूर्ण समारोप केला.
या सोहळ्याला राज्याचे माजी मंत्री बाळासाहेब थोरात, खासदार भाऊसाहेब वाकचौरे, आमदार अमोल खताळ, माजी नगराध्यक्षा दुर्गा तांबे, कथा समितीचे अध्यक्ष दिलीपराव शिंदे, उद्योजक आबासाहेब थोरात, संजय पाटणकर, कपिल पवार यांच्यासह राजकीय, सामाजिक, शैक्षणिक व आर्थिक क्षेत्रातील अनेक मान्यवर आणि हजारो भाविक मोठ्या संख्येने उपस्थित होते.