राज्यातील प्रत्येक पोलीस ठाण्यात उभारणार ‘अमली पदार्थविरोधी स्वतंत्र युनिट’, मुख्यमंत्र्यांची मोठी घोषणा, आमदार अमोल खताळ यांच्या पाठपुराव्याला यश

महाराष्ट्र संवाद न्यूज ऑनलाईन
संगमनेर:
अमली पदार्थांचा समूळ उच्चाटन करण्यासाठी राज्यातील प्रत्येक जिल्ह्यातील पोलीस ठाण्यात ‘अमली पदार्थविरोधी स्वतंत्र युनिट’ उभारण्यात येणार असल्याची घोषणा मुख्यमंत्री देवेंद्र फडणवीस यांनी पावसाळी अधिवेशनात केली.
संगमनेर शहर आणि ग्रामीण भागासह राज्यभरात अमली पदार्थांच्या वाढत्या विळख्याविरोधात आता प्रशासनाकडून अत्यंत कठोर पावले उचलली जाणार आहेत. संगमनेरचे आमदार अमोल खताळ यांनी विधिमंडळाच्या अधिवेशनात वेळोवेळी केलेल्या सातत्यपूर्ण पाठपुराव्याला अखेर मोठे यश आले आहे.
संगमनेर तालुक्यात अमली पदार्थांचा पुरवठा, तस्करी आणि विक्रीचे प्रमाण वाढत असल्याने स्थानिक नागरिकांकडून तीव्र चिंता व्यक्त केली जात होती. युवकांचे भविष्य उद्ध्वस्त करणाऱ्या या घातक प्रवृत्तीला तातडीने आळा घालण्याची आग्रही मागणी आमदार अमोल खताळ यांनी गृहमंत्री आणि मुख्यमंत्र्यांकडे लावून धरली होती. अमली पदार्थांच्या सखोल तपासासाठी स्थानिक पोलिसांचे विशेष पथक नेमावे, या अवैध धंद्यांना राजाश्रय देणाऱ्यांची सखोल चौकशी व्हावी आणि दोषींवर कायद्यानुसार कठोरात कठोर कारवाई केली जावी, याकडे त्यांनी विधिमंडळात सातत्याने लक्ष वेधले होते.
या महत्त्वाच्या मागणीची दखल घेत मुख्यमंत्र्यांनी विधानसभेत राज्य शासनाची भूमिका स्पष्ट केली. राज्यातील अमली पदार्थांची विक्री, तस्करी आणि सेवन रोखण्यासाठी सरकार व्यापक मोहीम राबवत असून, या नवीन स्वतंत्र युनिटच्या माध्यमातून अमली पदार्थांच्या संपूर्ण साखळीचा शोध घेतला जाईल, असे त्यांनी सांगितले. पुरवठादार आणि तस्करांचे जाळे उद्ध्वस्त करून त्यांच्यावर प्रभावी कारवाई करण्यासाठी पोलीस यंत्रणेला याद्वारे अधिक बळ मिळणार आहे.
राज्य शासनाच्या या महत्त्वपूर्ण निर्णयाचे आमदार अमोल खताळ यांनी स्वागत केले आहे. अमली पदार्थांच्या विक्री, तस्करी व सेवनाविरोधात ‘शून्य सहनशीलता’ (झिरो टॉलरन्स) धोरण राबवून प्रशासनाने अधिक गतिमानतेने पावले उचलावीत, जेणेकरून आपल्या तरुण पिढीचे भविष्य सुरक्षित राहील, अशी अपेक्षा त्यांनी यावेळी व्यक्त केली.