माजी मंत्री थोरात म्हणाले… हे तर पेपरफुटी सरकार!

महाराष्ट्र संवाद न्यूज ऑनलाईन

संगमनेर: 

महाराष्ट्र शिक्षक पात्रता (टीईटी) परीक्षेची प्रश्नपत्रिका फुटल्याने नियोजित परीक्षा रद्द करण्याची नामुष्की सरकारवर ओढवली आहे. या अत्यंत संतापजनक प्रकारामुळे लाखो विद्यार्थ्यांच्या स्वप्नांवर आणि कष्टावर पुन्हा एकदा पाणी फिरले असून, यावरून काँग्रेसचे ज्येष्ठ नेते तथा माजी शिक्षणमंत्री बाळासाहेब थोरात यांनी राज्य सरकारवर तीव्र शब्दांत घणाघात केला आहे. 

वारंवार होणाऱ्या या प्रकारांमुळे तरुणांचे भविष्य पूर्णपणे धोक्यात आले असून, या गैरप्रकाराला सर्वस्वी जबाबदार असणाऱ्या दोषींवर तात्काळ व कठोर कायदेशीर कारवाई करावी, अशी मागणी त्यांनी केली आहे. भाजपच्या सत्ताकाळात पेपरफुटी ही जणू नित्याचीच बाब बनली असून, कोणतीही भरती प्रक्रिया किंवा पात्रता परीक्षा पारदर्शकपणे पार पाडण्यात सरकार अपयशी ठरत असल्याचा आरोप त्यांनी केला.

सततच्या पेपरफुटीमुळे प्रामाणिकपणे अभ्यास करणाऱ्या लाखो तरुणांचा वेळ, पैसा आणि मानसिक आरोग्य पणाला लागले आहे. शासनाच्या याच निष्काळजीपणामुळे विद्यार्थ्यांचे प्रचंड आर्थिक आणि शैक्षणिक नुकसान होत असून, सरकार मात्र या गंभीर परिस्थितीकडे सोयीस्कर दुर्लक्ष करत असल्याचे थोरात यांनी म्हटले आहे.

त्यांनी सरकारचा उल्लेख ‘पेपरफुटी सरकार’ असा करत, सर्वसामान्य जनता आता या सरकारला याच नावाने ओळखू लागल्याचा टोला लगावला. वारंवार घडणाऱ्या अशा घटनांमुळे आता शासकीय यंत्रणेकडून या प्रकरणाची निष्पक्ष चौकशी होईल, अशी खात्री विद्यार्थ्यांच्या मनात उरलेली नाही. त्यामुळे शासनाने या युवकांच्या आक्रोशाची आणि त्यांच्या तीव्र वेदनांची गंभीर दखल घेणे अत्यंत गरजेचे आहे.

टीईटी पेपरफुटीच्या या संपूर्ण प्रकरणाची मुळापासून सखोल चौकशी करण्यात यावी आणि या रॅकेटमागील मुख्य सूत्रधारांचा शोध घेऊन त्यांना कडक शासन करण्यात यावे, अशी आग्रही मागणी थोरात यांनी केली आहे. तसेच भविष्यात अशा गैरप्रकारांची पुनरावृत्ती टाळण्यासाठी सरकारने तातडीने ठोस आणि प्रभावी उपाययोजना अमलात आणाव्यात, अशी अपेक्षाही त्यांनी शेवटी व्यक्त केली.