NEET नंतर महाराष्ट्रात TET पेपरफुटीचा धक्का; परीक्षा रद्द झाल्याने ४ लाख उमेदवारांचे भविष्य टांगणीला, आमदार सत्यजीत तांबे संताप व्यक्त करताना म्हणाले…

महाराष्ट्र संवाद न्यूज ऑनलाईन
मुंबई:
NEET परीक्षांमधील गोंधळानंतर आता महाराष्ट्रातील शिक्षक पात्रता परीक्षा (TET) पेपरफुटीचे गंभीर प्रकरण समोर आले आहे. ठाण्यात TET परीक्षेचा पेपर फुटल्याचे उघडकीस आल्यानंतर उद्या होणारी परीक्षा तातडीने रद्द करण्यात आली आहे. या निर्णयामुळे परीक्षा देणाऱ्या तब्बल ४ लाख २८ हजार उमेदवारांवर मोठा अन्याय झाला असून, राज्यातील ढासळलेल्या परीक्षा व्यवस्थेचे अपयश यातून पुन्हा एकदा चव्हाट्यावर आले असल्याची घणाघाती टीका विधान परिषद आमदार सत्यजीत तांबे यांनी केली आहे.
महाराष्ट्रात आता ‘पेपरफुटी’ हीच नवी ‘परीक्षा पद्धत’ झाली आहे का, असा संतप्त सवाल उपस्थित करत आमदार तांबे यांनी सरकारवर निशाणा साधला. सातत्याने होणाऱ्या अशा गैरप्रकारांमुळे विद्यार्थ्यांची मेहनत, वेळ आणि पैसा तर वाया जात आहेच, पण त्यांच्यात मानसिक नैराश्य आणि असुरक्षिततेची भावनाही वाढत असल्याचे त्यांनी सांगितले.
हे TET प्रकरण इतर परीक्षांपेक्षा अधिक संवेदनशील आहे कारण सर्वोच्च न्यायालयाच्या निर्देशानुसार अनेक शिक्षकांना आपली नोकरी वाचवण्यासाठी ही परीक्षा उत्तीर्ण होणे बंधनकारक आहे. यामध्ये २० ते ३० वर्षे सेवा केलेले आणि निवृत्तीच्या उंबरठ्यावर असलेले शिक्षकही सामील आहेत. अशा वेळी पेपर फुटल्याने त्यांच्या कुटुंबाच्या भवितव्यावरच मोठी कुऱ्हाड कोसळली आहे.
स्वातंत्र्याच्या ८० वर्षांनंतर जग AI आणि सायबर सुरक्षेच्या युगात पोहोचले असताना, आपण अजूनही एक परीक्षा सुरक्षितपणे घेऊ शकत नाही, ही अत्यंत दुर्दैवी बाब असल्याचे तांबे यांनी नमूद केले. या संपूर्ण व्यवस्थेच्या मुळाशी भ्रष्टाचार असून, व्यवस्था पारदर्शक झाल्यास काहींचे हितसंबंध धोक्यात येतील म्हणूनच ही व्यवस्था सुधारू दिली जात नसल्याचा ठाम आरोप त्यांनी केला.
केवळ काही आरोपींना अटक करून हा प्रश्न सुटणार नसून परीक्षा प्रणालीची संपूर्ण पुनर्रचना करणे गरजेचे आहे. सरकारने हा अन्याय तातडीने थांबवून परीक्षा व्यवस्थेवरील जनतेचा विश्वास पुन्हा प्रस्थापित करावा, अशी मागणी आमदार सत्यजीत तांबे यांनी केली आहे.