अवैध गर्भलिंग निदान व गर्भपात रॅकेटचा पर्दाफाश; शिरूरमधून आणखी एका डॉक्टरला अटक, आठ डॉक्टरांसह आरोपींची संख्या २४ वर

महाराष्ट्र संवाद न्यूज ऑनलाईन
श्रीरामपूर:
बेकायदेशीरपणे गर्भलिंग निदान चाचण्या आणि अवैध गर्भपात करणाऱ्या एका मोठ्या रॅकेटचा पोलिसांनी पर्दाफाश केला असून, या गुन्ह्याची व्याप्ती आता वेगवेगळ्या जिल्ह्यांमध्ये पसरली आहे. पोलिसांकडून सुरू असलेल्या अत्यंत बारकाईने तपासादरम्यान काल या प्रकरणात आणखी एका डॉक्टरला अटक करण्यात आली आहे, अशी माहिती श्रीरामपूरचे अपर पोलीस अधीक्षक सोमनाथ वाघचौरे यांनी ‘महाराष्ट्र संवाद न्यूज’ला दिली.
डॉ. ज्ञानेश्वर नायकोडी (वय ५४, रा. शिरूर, जि. पुणे) असे अटक करण्यात आलेल्या डॉक्टरचे नाव आहे. तो बीएएमएस असून या रॅकेटमध्ये सक्रिय सहभाग निष्पन्न झाल्यामुळे पोलिसांनी ही कारवाई केली असून, आज आरोपीला राहता न्यायालयात हजर केले असता न्यायालयाने त्याला ८ दिवसांची पोलीस कोठडी सुनावली आहे.
या कोठडीदरम्यान संबंधित डॉक्टरकडे गर्भवती महिलांना कोण पाठवत होते, यात कोणते एजंट सामील आहेत आणि आतापर्यंत किती महिलांच्या चाचण्या किंवा गर्भपात करण्यात आले, याचा सखोल तपास केला जाणार आहे.
या संपूर्ण प्रकरणाचा तांत्रिक आणि सखोल तपास केला असता, विविध तालुक्यांमध्ये या एजंटचे मोठे जाळे सक्रिय असल्याचे समोर आले आहे. यामध्ये अनेक डॉक्टर, मेडिकल चालक आणि एजंट यांचा थेट सहभाग असल्याचे निष्पन्न झाले आहे.
या कारवाईमुळे आतापर्यंत अटक करण्यात आलेल्या आरोपींची एकूण संख्या २४ वर पोहोचली असून, यामध्ये धक्कादायक बाब म्हणजे ८ डॉक्टरांचा समावेश आहे. तसेच ३ मेडिकल चालक आणि वैद्यकीय साहित्याचा पुरवठा करणारा एक मोठा पुरवठादार देखील पोलिसांच्या जाळ्यात अडकला आहे.
तपासादरम्यान पोलिसांनी मोठी कारवाई करत अवैध गर्भलिंग निदान चाचणीसाठी वापरण्यात येणारी एकूण ६ सोनोग्राफी मशीन्स वेगवेगळ्या ठिकाणांहून आणि वेगवेगळ्या जिल्ह्यांतील आरोपींकडून जप्त केली आहेत. यासोबतच गुन्ह्यात वापरण्यात आलेली ४ चारचाकी वाहने आणि १ दुचाकी देखील पोलिसांनी हस्तगत केली आहे.
या आंतरजिल्हा रॅकेटचा पुढील तपास अहिल्यानगरचे जिल्हा पोलीस अधीक्षक एम. सुदर्शन आणि अप्पर पोलीस अधीक्षक सोमनाथ वाघचौरे यांच्या मार्गदर्शनाखाली डीवायएसपी अमोल भारती व सहाय्यक पोलीस निरीक्षक आठरे करत आहेत.