लोकशाहीर अण्णाभाऊ साठे यांना मरणोत्तर ‘भारतरत्न’ द्या; संगमनेर येथील सोहळ्यात पानिपतकार विश्वास पाटील यांची मागणी

महाराष्ट्र संवाद न्यूज ऑनलाईन 

संगमनेर:

संयुक्त महाराष्ट्राच्या चळवळीत मोलाचे योगदान देणारे आणि महानगरीय साहित्याचा पाया रचणारे सत्यशोधक साहित्यरत्न लोकशाहीर अण्णाभाऊ साठे यांना केंद्र सरकारने मरणोत्तर ‘भारतरत्न’ पुरस्कार प्रदान करावा, अशी आग्रही मागणी अखिल भारतीय मराठी साहित्य संमेलनाचे अध्यक्ष तथा प्रसिद्ध लेखक पानिपतकार विश्वास पाटील यांनी केली. 

मालपाणी लॉन्स येथे आयोजित अण्णाभाऊ साठे यांच्या १०६ व्या जयंती सोहळा व गुणगौरव कार्यक्रमात ते बोलत होते. या सोहळ्यात मातंग समाजातील पहिल्या महिला आयएएस अधिकारी ठरलेल्या प्रेरणा खवळे यांच्यासह प्रा. रघुनाथ खरात यांना ‘जीवनगौरव’ तर डॉ. साहेबराव गायकवाड, डॉ. भाऊसाहेब पवार, प्रा. तुकाराम सोळशे, प्राचार्य काळूराम बोरुडे, मिराबाई आव्हाड आणि प्राचार्य चंद्रकांत चव्हाण यांना ‘समाजभूषण’ पुरस्काराने सन्मानित करण्यात आले.

विश्वास पाटील म्हणाले की, अण्णाभाऊंचे जीवन अत्यंत संघर्षाचे होते आणि त्यांच्या ‘फकीरा’ व ‘माकडीचा चाळ’ या कादंबऱ्या साहित्य जगतासाठी अजिंठा-वेरूळसारख्या अमूल्य कलाकृती आहेत. डॉ. बाबासाहेब आंबेडकर व अण्णाभाऊ साठे हे साहित्य संमेलनाचे अध्यक्ष होऊ शकले नाहीत, याबद्दल खंत व्यक्त करत त्यांनी अण्णाभाऊंना ‘भारतरत्न’ देण्याची मागणी केली.

कार्यक्रमात बोलताना काँग्रेसच्या अनुसूचित जाती-जमाती विभागाचे प्रदेशाध्यक्ष डॉ. अनिरुद्ध वनकर यांनी महापुरुषांना एका ठरावीक जातीत न बांधता त्यांच्या मानवतेच्या विचारांचा वारसा पुढे नेण्याचे आवाहन केले, तसेच संविधानाचे रक्षण करणे हीच काळाची गरज असल्याचे सांगितले.

आमदार सत्यजित तांबे यांनी तरुणांना सॅल्यूट मारण्याऐवजी सॅल्यूट घेणारे अधिकारी बनण्याचा सल्ला दिला, तसेच संगमनेर शहरात छत्रपती शिवाजी महाराज, डॉ. बाबासाहेब आंबेडकर आणि महात्मा फुले यांच्यासोबतच अण्णाभाऊ साठे यांचे अद्यावत स्मारक उभारले जाणार असल्याची माहिती दिली.

यावेळी डॉ. जयश्रीताई थोरात यांनी अशा व्याख्यानांमुळे तरुणांना योग्य दिशा मिळत असल्याचे सांगत जंतर-मंतरवरील आंदोलनाने विद्यार्थ्यांमध्ये हक्कांची जाणीव निर्माण केल्याचे नमूद केले. तर नवनिर्वाचित आयएएस अधिकारी प्रेरणा खवळे यांनी आपल्या यशाचे श्रेय आई-वडिलांना देत विद्यार्थ्यांनी कोणत्याही अडचणींना न घाबरता ध्येयाकडे वाटचाल करावी असा संदेश दिला.

कार्यक्रमाचे प्रास्ताविक कार्याध्यक्ष संतोष गायकवाड यांनी केले, सूत्रसंचालन निलेश पर्बत यांनी तर आभार दत्तात्रय अवचिते यांनी मानले. या सोहळ्याला लोकप्रतिनिधी, विविध पदाधिकारी, कार्यकर्ते व नागरिक मोठ्या संख्येने उपस्थित होते.