हॉटेल सुरभीपर्यंत पोहोचले बनावट दारूचे धागेदोरे; आस्थापना कायमस्वरूपी सील करा, शिवसेनेच्या (ठाकरे गट) अमर कतारी यांची मागणी

महाराष्ट्र संवाद न्यूज ऑनलाईन 

संगमनेर: 

संगमनेरमध्ये अवैध दारूवर राज्य उत्पादन शुल्क विभागाच्या पथकाने मोठे कारवाई केली. संबंधित ठिकाणी सातत्याने कारवाया झाल्याने आरोपींच्या आस्थापना कायमस्वरूपी सील करण्याची मागणी दारूबंदी कृती समितीचे जिल्हाध्यक्ष तथा शिवसेना (उद्धव बाळासाहेब ठाकरे) तालुकाप्रमुख अमर कतारी यांनी केली आहे.

संगमनेर शहरात गोवा बनावटीची व महाराष्ट्रात प्रतिबंधित असलेली बनावट दारू विक्री करणाऱ्यांविरोधात संगमनेरच्या राज्य उत्पादन शुल्क विभागाच्या पथकाने ६ ऑगस्ट रोजी मोठी कारवाई केली. या कारवाईत ‘रॉयल इम्पॅक्ट’ व्हिस्कीचे ३४ बॉक्स, विविध नामांकित ब्रँडच्या रिकाम्या बाटल्या, बनावट दारू बनवण्याचे साहित्य आणि वाहतुकीसाठी वापरलेले वाहन असा लाखो रुपयांचा मुद्देमाल जप्त करण्यात आला आहे.

पथकाने शिवाजी नगर, वडजे मळा परिसरातील एका घरावर छापा टाकून शिवकुमार मनोजकुमार कालडा व सौरभ अरविंद पापडे या दोघांना ताब्यात घेऊन गुन्हा दाखल केला असून संगमनेर न्यायालयाने त्यांना तीन दिवसांची पोलीस कोठडी सुनावली आहे. या प्रकरणाचे धागेदोरे नेहरू चौकातील हॉटेल सुरभी (FL-3) पर्यंत पोहोचल्याने तेथूनही ६१ हजार ३१० रुपयांचा मुद्देमाल जप्त करून गुन्हा नोंदवण्यात आला आहे.

राज्य उत्पादन शुल्क विभागाने केलेल्या या कारवाईचे स्वागत होत असले तरी, केवळ किरकोळ छापे मारून हा प्रकार थांबणार नाही, अशी आक्रमक भूमिका दारूबंदी कृती समितीने घेतली आहे. ज्या ठिकाणी अवैध किंवा बनावट दारू विक्री आढळेल, त्या आस्थापनेचा परवाना रद्द करून ती कायमस्वरूपी सील करण्यात यावी, अशी स्पष्ट अमर कतारी यांनी केली आहे. शहरात टपरीपासून ते हॉटेल आणि बारपर्यंत बनावट दारूची विक्री होत असल्याच्या तक्रारी नागरिक सातत्याने करत असल्याने प्रशासनाने केवळ देखावा न करता कठोर पावले उचलावीत, असे कतारी यांनी नमूद केले.

बनावट दारू ही मानवी आरोग्यासाठी अत्यंत घातक ठरू शकते. त्यामुळे जप्त केलेल्या संशयित दारूचे अन्न व औषध प्रशासन तसेच अधिकृत प्रयोगशाळेत तातडीने परीक्षण करण्यात यावे आणि आरोग्यास घातक घटक आढळल्यास संबंधितांवर कडक कलमांखाली गुन्हे दाखल करावेत, असा आग्रह कतारी यांनी धरला आहे.

सध्या आखाड महिन्याचे शेवटचे दिवस असल्याने दारूची अवैध विक्री वाढण्याची शक्यता आहे. त्यामुळे पोलीस प्रशासन आणि उत्पादन शुल्क विभागाने संगमनेर शहर व तालुक्यात संयुक्त विशेष धडक मोहीम राबवून अवैध दारू विक्रेते आणि त्यांना पाठीशी घालणाऱ्यांवर निष्पक्ष कारवाई करावी, अशी मागणी करण्यात आली आहे.

प्रशासनाने कोणत्याही दबावाला किंवा संगनमताला बळी न पडता नियमित तपासणी चालू ठेवावी, जेणेकरून कारवाईनंतर पुन्हा त्याच ठिकाणी अवैध धंदे सुरू होणार नाहीत. दारूबंदी कृती समितीने केलेल्या मागण्यांकडे प्रशासनाने दुर्लक्ष केल्यास आणि अवैध दारू विक्री रोखण्यासाठी ठोस धोरण न आखल्यास संगमनेरमधील नागरिकांना सोबत घेऊन रस्त्यावर उतरून तीव्र आंदोलन छेडले जाईल, असा इशारा अमर कतारी यांनी दिला आहे.