लोकसेवा फाउंडेशनचा ‘वृद्धाश्रमात दिवाळी’ उपक्रम उत्साहात संपन्न!

महाराष्ट्र संवाद न्यूज ऑनलाईन-
दिवाळी म्हणजे आनंद, उत्साह आणि आप्तस्वकीयांसोबत स्नेहाचे क्षण अनुभवण्याचा सण. मात्र, परिस्थितीमुळे वृद्धाश्रमात आयुष्याचा उत्तरार्ध व्यतीत करणाऱ्या अनेक ज्येष्ठ नागरिकांना कुटुंबापासून दूर राहावे लागते. अशा आजी-आजोबांच्या आयुष्यात आपुलकीचे आणि मायेचे क्षण निर्माण करण्याच्या सामाजिक भावनेतून लोकसेवा फाउंडेशनच्या वतीने राजूर-भंडारदरा रोडवरील कै. नानासाहेब देशमुख वृद्धाश्रमात ‘वृद्धाश्रमात दिवाळी’ हा उपक्रम मोठ्या उत्साहात साजरा करण्यात आला.
या उपक्रमांतर्गत वृद्धाश्रमातील आजी-आजोबांना दिवाळीचा फराळ, विविध भेटवस्तू, दिवाळी विशेषांक तसेच वाचनासाठी पुस्तके भेट देण्यात आली. या अनोख्या उपक्रमामुळे वृद्धाश्रमातील ज्येष्ठ नागरिकांच्या चेहऱ्यावर आनंद आणि समाधान झळकले. दिवाळीच्या आनंदात त्यांना सहभागी करून घेण्याचा हा प्रयत्न उपस्थितांसाठी एक संवेदनशील आणि माणुसकीचा अनुभव देणारा ठरला.
दरवर्षी हा उपक्रम राबविण्याची संधी उपलब्ध करून दिल्याबद्दल ॲड. एम. एन. देशमुख साहेब तसेच राजहंस ज्येष्ठ नागरिक संघाचे संस्थापक नंदकिशोर बेल्हेकर सर यांचे लोकसेवा फाउंडेशनचे अध्यक्ष प्रथमेश बेल्हेकर यांनी आभार मानले. समाजातील गरजू आणि वंचित घटकांसोबत सण-उत्सव साजरे करण्याच्या उद्देशाने फाउंडेशन सातत्याने हा उपक्रम राबवत असून यंदाचे हे सातवे वर्ष असल्याचे त्यांनी यावेळी स्पष्ट केले.
या प्रसंगी श्रेयस करपे, संकेत घोडेकर आणि संभव लोढा उपस्थित होते. उपक्रमाच्या यशस्वितेसाठी विवेक कोथमिरे, प्रीतेश नवले, अनिल केदारी, संकेत काकडे, दर्शन गायकवाड, ब्रह्मा खिडके आणि अक्षय नेवासकर यांनी विशेष योगदान दिले. तसेच दैनिक युवावार्ताचे संपादक किसनभाऊ हासे, ज्येष्ठ पत्रकार संतोष खेडलेकर, दिव्य मराठीचे गौतम गायकवाड आणि लोकमतचे शेखर पानसरे यांनी दिवाळी अंक व पुस्तके भेट दिली. नगरसेवक सोमेश्वर दिवटे, गौरव डोंगरे, विकीशेठ वर्मा व तुषार भगत यांच्या वतीने ज्येष्ठ नागरिकांसाठी भेटवस्तू देण्यात आल्या.