5G च्या युगातही कुंभारवाडी नेटवर्कविना! अखेर केंद्र सरकारची मंजुरी; सत्यजीत तांबे यांच्या पाठपुराव्याला यश

महाराष्ट्र संवाद न्यूज ऑनलाईन-
जग 5G तंत्रज्ञानाच्या पुढे जात सॅटेलाइट इंटरनेटच्या नव्या पर्वात प्रवेश करत असताना, संगमनेर तालुक्यातील कुंभारवाडी गावातील नागरिकांना साध्या मोबाईल नेटवर्कसाठी वर्षानुवर्षे प्रतीक्षा करावी लागत होती. नेटवर्कअभावी ऑनलाइन शिक्षणापासून शासकीय योजनांच्या लाभापर्यंत अनेक सुविधांपासून वंचित राहणाऱ्या कुंभारवाडीकरांसाठी अखेर दिलासादायक बातमी समोर आली आहे. केंद्र सरकारच्या डिजिटल भारत निधीअंतर्गत गावातील 4G मोबाईल नेटवर्क प्रकल्पाला मंजुरी मिळाली असून, आमदार सत्यजीत तांबे यांच्या सातत्यपूर्ण पाठपुराव्यामुळे गावात नेटवर्क सुविधा उपलब्ध होण्याचा मार्ग मोकळा झाला आहे.
आजच्या डिजिटल युगात मोबाईल नेटवर्क ही केवळ संपर्काची सुविधा राहिलेली नसून शिक्षण, शेती, आरोग्य, शासकीय सेवा आणि दैनंदिन व्यवहारांची महत्त्वाची गरज बनली आहे. मात्र, कुंभारवाडी गावात मोबाईल नेटवर्क उपलब्ध नसल्यामुळे ग्रामस्थांना या सुविधांचा लाभ घेताना अनेक अडचणींचा सामना करावा लागत होता. गावातील विद्यार्थ्यांना ऑनलाइन वर्ग, अभ्यासाचे साहित्य आणि शैक्षणिक माहिती मिळवण्यासाठी नेटवर्क असलेल्या ठिकाणी जावे लागत होते. त्यामुळे त्यांच्या शैक्षणिक कामकाजावरही परिणाम होत होता.
शेतकऱ्यांची परिस्थितीही यापेक्षा वेगळी नव्हती. ई-पीक पाहणी, ऑनलाइन अर्ज, शेतीविषयक माहिती आणि विविध शासकीय कामांसाठी त्यांना मोबाईल नेटवर्क शोधावे लागत होते. महिलांनाही मुख्यमंत्री माझी लाडकी बहीण योजनेच्या ई-केवायसीसह इतर शासकीय योजनांचा लाभ घेताना अडचणी येत होत्या. ऑनलाइन अर्ज भरणे, कागदपत्रे पाठवणे, ओटीपी मिळवणे तसेच नातेवाइकांशी संपर्क साधणे यांसारख्या साध्या वाटणाऱ्या गोष्टींसाठीही ग्रामस्थांना कसरत करावी लागत होती. डिजिटल भारताच्या संकल्पनेत सहभागी होण्याची इच्छा असूनही केवळ नेटवर्क नसल्यामुळे कुंभारवाडीकरांना अनेक सुविधांपासून दूर राहावे लागत होते.
गावभेटीदरम्यान ग्रामस्थांनी मोबाईल नेटवर्कची ही गंभीर समस्या आमदार सत्यजीत तांबे यांच्या निदर्शनास आणून दिली होती. नागरिकांची गैरसोय लक्षात घेऊन त्यांनी या प्रश्नाचा पाठपुरावा करण्यास सुरुवात केली. यासंदर्भात केंद्रीय दूरसंचार मंत्री ज्योतिरादित्य सिंधिया यांच्याकडे पत्रव्यवहार करून कुंभारवाडी गावाला मोबाईल नेटवर्क सुविधा उपलब्ध करून देण्याची मागणी करण्यात आली होती. त्यानंतरही या प्रश्नाचा सातत्याने पाठपुरावा सुरू ठेवण्यात आला. अखेर या प्रयत्नांना यश आले असून, केंद्र सरकारच्या डिजिटल भारत निधीअंतर्गत मंजूर करण्यात आलेल्या 4G प्रकल्पात कुंभारवाडी गावाचा समावेश करण्यात आला आहे.
या प्रकल्पामुळे कुंभारवाडी गावात मोबाईल नेटवर्क सुविधा उपलब्ध होण्याचा मार्ग मोकळा झाला आहे. प्रत्यक्ष नेटवर्क सेवा सुरू झाल्यानंतर विद्यार्थ्यांना ऑनलाइन शिक्षण, शेतकऱ्यांना शेतीविषयक डिजिटल सेवा, महिलांना शासकीय योजनांची प्रक्रिया आणि सर्वसामान्य नागरिकांना दैनंदिन संपर्कासाठी मोठा दिलासा मिळणार आहे. ऑनलाइन व्यवहार, डिजिटल पेमेंट आणि विविध शासकीय सेवांचा लाभ घेणेही अधिक सुलभ होणार आहे. त्यामुळे गावाच्या डिजिटल विकासाला नवी दिशा मिळण्याची अपेक्षा व्यक्त होत आहे.
दरम्यान, संगमनेर तालुक्यातील केवळ कुंभारवाडीच नव्हे, तर पोखरी बाळेश्वर, वनकुटे, पिंपळगाव माथा, भोजदरी, धुमाळवाडी आणि डोळासणे या गावांमध्येही मोबाईल नेटवर्कची सुविधा उपलब्ध व्हावी, यासाठी आमदार सत्यजीत तांबे यांचा पाठपुरावा सुरू आहे. त्यामुळे या गावांनाही भविष्यात नेटवर्क सुविधेचा लाभ मिळणार का, याकडे ग्रामस्थांचे लक्ष लागले आहे.
एकीकडे डिजिटल इंडियाच्या माध्यमातून देश आधुनिक तंत्रज्ञानाकडे वेगाने वाटचाल करत असताना, ग्रामीण भागातील शेवटच्या घटकापर्यंत इंटरनेट आणि मोबाईल नेटवर्क पोहोचवण्याचे आव्हान अजूनही कायम आहे. कुंभारवाडीतील 4G प्रकल्पाला मिळालेली मंजुरी ही या दिशेने महत्त्वाची घडामोड ठरणार असून, आता प्रत्यक्ष नेटवर्क सेवा कधी सुरू होते, याची ग्रामस्थांना प्रतीक्षा आहे.