संगमनेर तालुक्यात मुलींच्या स्वसंरक्षणासाठी ‘मुक्कामार’ अभियान सुरू; अभिनेत्री इशिता शर्मा व डॉ. जयश्रीताई थोरात यांचा स्तुत्य पुढाकार

महाराष्ट्र संवाद न्यूज ऑनलाईन 

संगमनेर:

संगमनेर तालुक्यातील २७ विद्यालयांमधील दीड हजार विद्यार्थिनींना वर्षभर स्वसंरक्षणाचे धडे देण्यासाठी ‘मुक्कामार’ अभियान मोठ्या उत्साहात सुरू करण्यात आले असून, एकविरा फाउंडेशन आणि मुक्कामार फाउंडेशन यांच्यात नुकताच याबाबतचा महत्त्वाचा सामंजस्य करार करण्यात आला आहे.

वडगाव पान येथील डी.के. मोरे जनता विद्यालयात आयोजित करण्यात आलेल्या विशेष कार्यक्रमात प्रसिद्ध हिंदी चित्रपट अभिनेत्री तथा मुक्कामार फाउंडेशनच्या संस्थापक इशिता शर्मा आणि एकविरा फाउंडेशनच्या अध्यक्षा डॉ. जयश्रीताई थोरात यांच्या प्रमुख उपस्थितीत हा करार पार पडला.

यावेळी बोलताना अभिनेत्री इशिता शर्मा यांनी देशातील महिला व मुलींवरील वाढत्या अत्याचारांवर तीव्र चिंता व्यक्त केली. पुरोगामी महाराष्ट्रात अशा घटना घडणे हा कलंक असून, मुलींनी स्वतः आत्मनिर्भर व्हावे या उद्देशाने मुक्कामार फाऊंडेशनच्या वतीने त्यांना खेळाडू आणि फायटर बनवण्याचे प्रशिक्षण दिले जाणार असल्याचे त्यांनी स्पष्ट केले. संगमनेर तालुक्यात डॉ. जयश्रीताई थोरात यांच्या संकल्पनेतून राबवला जाणारा हा उपक्रम संपूर्ण राज्यासाठी दिशादर्शक ठरेल, असे गौरवोद्गार त्यांनी काढले.

या कार्यक्रमास माजी आमदार डॉ. सुधीर तांबे, दुर्गाताई तांबे यांच्यासह विविध मान्यवर व १५०० विद्यार्थिनी मोठ्या संख्येने उपस्थित होत्या.

उपस्थितांना मार्गदर्शन करताना डॉ. सुधीर तांबे यांनी मुलींनी चांगला आहार घेत स्वतःला शारीरिकदृष्ट्या तंदुरुस्त आणि धाडसी बनवावे, असे आवाहन केले. कुणी त्रास दिल्यास न घाबरता तातडीने शाळा किंवा पोलिसांत तक्रार करण्याचे धाडस दाखवावे, असे ते म्हणाले.

कार्यक्रमाचे प्रास्ताविक करताना कॅन्सर तज्ज्ञ डॉ. जयश्रीताई थोरात यांनी लोकनेते बाळासाहेब थोरात यांच्या मार्गदर्शनाखाली एकविरा फाउंडेशनने संगमनेर तालुक्यात महिला सबलीकरणासाठी केलेल्या कार्याची माहिती दिली. मुक्कामार अभियानांतर्गत २७ शाळांमधून हा उपक्रम राबवला जाणार असून, प्रत्येक शाळेतील तीन शिक्षकांना विशेष प्रशिक्षण देण्यात आले आहे. हे शिक्षक आठवड्यातून तीन तास मुलींना स्वसंरक्षणाचे प्रशिक्षण देणार आहेत. वर्षभर हा कार्यक्रम यशस्वीपणे राबविल्यानंतर महाविद्यालयांमध्येही हा उपक्रम सुरू करण्यात येणार असल्याचे त्यांनी सांगितले. मुलींनी कोणत्याही भीतीशिवाय या निर्भीड अभियानात सहभागी व्हावे, असे आवाहन त्यांनी केले.

तसेच, गत ७ मार्च रोजी वडगाव पान येथील चिमुकलीवर झालेल्या ॲसिड हल्ल्याला पाच महिने लोटूनही आरोपी पोलिसांच्या हाती न लागल्याबद्दल त्यांनी तीव्र नाराजी व्यक्त करत, आरोपीला लवकरात लवकर पकडून कठोर शिक्षा मिळण्याची मागणी त्यांनी यावेळी केली.

दुर्गाताई तांबे यांनीही मनोगत व्यक्त करत वाढत्या अत्याचारांच्या पार्श्वभूमीवर हे प्रशिक्षण मुलींना सक्षम करण्यासाठी नक्कीच फायदेशीर ठरेल, असे विश्वासाने सांगितले. या कार्यक्रमाचे सूत्रसंचालन नामदेव कहांडळ यांनी केले तर आभार बाबा ओहोळ यांनी मानले. या आगळ्यावेगळ्या आणि महत्त्वपूर्ण सोहळ्यास परिसरातील शाळांचे शिक्षक, पालक आणि मोठ्या संख्येने विद्यार्थी उपस्थित होते.