कुंभेफळ येथे घरासमोरील अंगणात खेळत असलेल्या अंकुर प्रशांत कोटकर या तीन वर्षीय चिमुकल्यावर बिबट्याने अचानक हल्ला केल्याची थरारक घटना शुक्रवारी दुपारी ३ वाजेच्या सुमारास घडली. बालकाच्या आई, आजी, आजोबा आणि शेतातील कामगारांनी तातडीने प्रसंगावधान राखत आरडाओरड केल्याने बिबट्याने पळ काढला आणि बालकाची बिबट्याच्या तावडीतून सुटका झाली.
या हल्ल्यात जखमी झालेल्या अंकुरवर प्रथम सुगाव येथील सरकारी रुग्णालयात प्राथमिक उपचार करण्यात आले, त्यानंतर पुढील उपचारासाठी त्याला संगमनेर येथील खासगी हॉस्पिटलमध्ये हलविण्यात आले आहे.
घटनेची माहिती मिळताच वनरक्षक पोपट कोटकर, बबन झोळेकर आणि वनपरीक्षेत्र अधिकारी आनंदा पाटील यांनी रुग्णालयात धाव घेऊन जखमी बालकाची विचारपूस केली. या घटनेमुळे कुंभेफळ परिसरात प्रचंड भीतीचे वातावरण पसरले असून वनविभागाने परिसराची पाहणी करून नागरिकांना सतर्क राहण्याचे आवाहन केले आहे.
कुंभेफळ परिसरात बिबट्याचा वावर सातत्याने धोक्याची घंटा ठरत आहे. यापूर्वी मे महिन्यातही याच परिसरात श्रीशा वैभव शिंदे या तीन वर्षीय बालिकेवर बिबट्याने हल्ला केला होता, त्यावेळीही नागरिकांच्या प्रसंगावधानाने मोठा अनर्थ टळला होता. वारंवार घडणाऱ्या या घटनांमुळे संतप्त ग्रामस्थांनी बिबट्याचा तातडीने बंदोबस्त करण्याची मागणी लावून धरली आहे.
अंभोरे घाटात दुचाकीस्वारांवर बिबट्याचे हल्ले; वनविभागाच्या दुर्लक्षावर ग्रामस्थ आक्रमक – अंभोरे घाट परिसरात बिबट्यांच्या हल्ल्यांचे प्रमाण गंभीररीत्या वाढले आहे. दोन दिवसांपूर्वी डिग्रस येथील जयश्री सोमनाथ पवार या दुचाकीवरून जात असताना बिबट्याने त्यांच्यावर अचानक झडप घातली. तसेच याच परिसरात अरुण राजू बर्डे (वय १७) याच्यावरही बिबट्याने हल्ला केला. या दोघांवरही रुग्णालयात उपचार करण्यात आले. वाहनांवर बिबट्यांचे हल्ले वाढल्याने घाट परिसरात रात्रीच्या वेळी प्रवास करणाऱ्या प्रवाशांमध्ये भीतीचे सावट आहे. या गंभीर समस्येकडे वनविभागाला वारंवार सूचना देऊनही दुर्लक्ष होत असल्याचा थेट आरोप ग्रामस्थांनी केला असून, घाटात तातडीने ठोस उपाययोजना करण्याची जोरदार मागणी केली आहे.
