संगमनेर शहर व परिसरातील गरीब, गरजू आणि होतकरू युवक-युवतींना पोलीस भरतीसाठी योग्य मार्गदर्शन व आवश्यक सहाय्य पुरवण्यासाठी ‘मिशन खाकी पोलीस भरती योद्धा सहाय्यता अभियान’ अंतर्गत शहरात व्यापक जनजागृती मोहीम राबवली जात आहे. उपमुख्यमंत्री एकनाथ शिंदे, खासदार डॉ. श्रीकांत शिंदे आणि गृहराज्यमंत्री योगेश कदम यांच्या मार्गदर्शनाखाली २ ऑक्टोबर रोजी या अभियानाचा शुभारंभ करण्यात आला असून, त्याअनुषंगाने शहरातील विविध पोलीस भरती प्रशिक्षण केंद्रांना भेटी देऊन विद्यार्थ्यांशी थेट संवाद साधला जात आहे.
पोलीस भरतीची तयारी करताना विद्यार्थ्यांना आर्थिक अडचणी, योग्य मार्गदर्शनाचा अभाव, अर्ज प्रक्रियेतील तांत्रिक अडचणी, कागदपत्रांची पूर्तता आणि अभ्यासाचे नियोजन अशा अनेक आव्हानांना सामोरे जावे लागते. या पार्श्वभूमीवर, शिवसेनेचे शहर प्रमुख विनोद सूर्यवंशी यांच्यासह विविध कार्यकर्त्यांनी संगमनेर शहरातील प्रशिक्षण केंद्रांना भेटी देऊन विद्यार्थ्यांच्या अडचणी जाणून घेतल्या. विद्यार्थ्यांना भेडसावणाऱ्या समस्या सोडवण्यासाठी ‘मिशन खाकी’च्या लिंकवर आपली माहिती भरण्याचे आवाहन यावेळी करण्यात आले.
आर्थिक अडचण किंवा मार्गदर्शनाच्या अभावामुळे कोणत्याही शेतकरी व कष्टकरी कुटुंबातील मुला-मुलीचे खाकी वर्दीचे स्वप्न अपूर्ण राहू नये, असा उपमुख्यमंत्री एकनाथ शिंदे यांचा मानस आहे. मैदानावर घाम गाळणाऱ्या आणि अभ्यासिकेत अहोरात्र मेहनत करणाऱ्या भावी पोलीस योद्ध्यांच्या पाठीशी ‘मिशन खाकी’चा समन्वय कक्ष खंबीरपणे उभा राहणार असून, सर्व प्रकारची प्रशासकीय व शैक्षणिक मदत पुरवली जाणार असल्याचे कार्यकर्त्यांनी सांगितले.
दरम्यान, वरिष्ठ पातळीवर लवकरच बैठक होऊन पोलीस भरतीचे वेळापत्रक जाहीर होण्याची शक्यता आहे. सर्व रिक्त जागा भरण्याच्या दृष्टीने ही प्रक्रिया राबवली जाणार असल्याने इच्छुक युवक-युवतींनी आपल्या तयारीला गती देऊन या सुवर्णसंधीचे सोने करावे, असे आवाहनही याप्रसंगी करण्यात आले.
