आमदार अमोल खताळ यांच्या पाठपुराव्याला यश; संगमनेर तालुक्यातील प्रलंबित पाणीपुरवठा योजना नोव्हेंबरपर्यंत पूर्ण करा: मंत्री गुलाबराव पाटील यांचे निर्देश… उपअभियंता सक्तीच्या रजेवर, तर योजनांचे होणार थर्ड पार्टी ऑडिट

महाराष्ट्र संवाद न्यूज ऑनलाईन-
संगमनेर तालुक्यातील तीव्र दुष्काळजन्य परिस्थिती आणि आगामी काळातील संभाव्य पाणीटंचाईची भीषणता लक्षात घेता, प्रलंबित असणाऱ्या सर्व पाणीपुरवठा योजनांची कामे नोव्हेंबरपर्यंत कोणत्याही परिस्थितीत पूर्ण करा, असे कठोर निर्देश राज्याचे पाणीपुरवठा व स्वच्छता मंत्री गुलाबराव पाटील यांनी प्रशासनाला दिले आहेत.
आमदार अमोल खताळ यांच्या पुढाकाराने मंत्रालयात आयोजित करण्यात आलेल्या विशेष आढावा बैठकीत हा महत्त्वपूर्ण निर्णय घेण्यात आला. विभागाचे प्रधान सचिव पराग जैन, मुख्य अभियंता प्रशांत भामरे आणि मुख्य कार्यकारी अधिकारी श्रीमती देशपांडे यांच्यासह वरिष्ठ अधिकारी उपस्थित होते.
या बैठकीदरम्यान आमदार अमोल खताळ यांनी तालुक्यातील घुलेवाडी, गुंजाळवाडी, तळेगाव, निमोण, सुकेवाडी, खांजापूर, चंदनापुरी, झोळे, हिवरगाव पावसा, वरवंडी, कासारा दुमाला आणि मांडवे आदीसह विविध गावांमधील पाणीपुरवठा योजनांच्या रखडलेल्या कामांकडे शासनाचे लक्ष वेधले. केवळ कागदावर योजना न दाखवता प्रत्यक्षात जनतेला पाणी मिळाले पाहिजे, अशी ठाम भूमिका मांडत त्यांनी अपूर्ण कामे, निधीची टंचाई आणि थकीत वीजबिलांचा प्रश्न बैठकीत लावून धरला.
आमदार खताळ यांनी विशिष्ट ठेकेदारांचे हित जपणाऱ्या अधिकाऱ्यांवर तीव्र नाराजी व्यक्त करत त्यांची चौकशी करण्याची मागणी केली. या मागणीची तात्काळ दखल घेत मंत्री गुलाबराव पाटील यांनी महाराष्ट्र जीवन प्राधिकरणाचे उपअभियंता थिटे यांना सक्तीच्या रजेवर पाठविण्याचे आदेश प्रधान सचिवांना दिले. याशिवाय तालुक्यातील अपूर्ण कामे आणि अतिरिक्त निधीच्या अंदाजपत्रकांचे राज्यस्तरीय यंत्रणेमार्फत ‘थर्ड पार्टी ऑडिट’ करण्याचा निर्णय घेण्यात आला असून, तपासात दोषी आढळणाऱ्या ठेकेदारांवर कडक कारवाईचा इशारा देण्यात आला आहे.
थकीत वीजबिलांमुळे पाणीपुरवठा योजना बंद पडू नयेत यासाठी आगामी मंत्रिमंडळ बैठकीत धोरणात्मक निर्णय घेतला जाईल, असे आश्वासनही यावेळी मंत्र्यांनी दिले. राजापूर परिसराला स्वच्छ आणि नियमित पाणीपुरवठा करणे तसेच ‘जल जीवन मिशन’ अंतर्गत सुटलेल्या सर्व वाड्या-वस्त्यांचा समावेश करून सुधारित प्रशासकीय मान्यता देण्याचे निर्देशही बैठकीत देण्यात आले. संगमनेर तालुक्यातील प्रत्येक घटकाला पिण्याचे पाणी मिळवून देण्यासाठी हा पाठपुरावा अविरत सुरू राहील, असा विश्वास खताळ यांनी व्यक्त केला.