संगमनेर आगारात ‘शिवाई’ इलेक्ट्रिक बसेस, आमदार अमोल खताळ यांच्या हस्ते लोकार्पण; लोकार्पण कार्यक्रमात ज्येष्ठ अभिनेते नाना पाटेकर यांना उपस्थितांकडून श्रद्धांजली

महाराष्ट्र संवाद न्यूज ऑनलाईन-

राज्याचे परिवहन मंत्री प्रताप सरनाईक यांच्या माध्यमातून आणि आमदार अमोल खताळ यांच्या विशेष पाठपुराव्यातून संगमनेर आगारासाठी एकूण २५ ‘शिवाई’ इलेक्ट्रिक बसेस मंजूर करण्यात आल्या आहेत. त्यापैकी पहिल्या टप्प्यात प्राप्त झालेल्या बसेसचे आमदार अमोल खताळ व त्यांच्या पत्नी नीलम खताळ यांच्या हस्ते विधिवत पूजन करून लोकार्पण करण्यात आले.

या नवीन वातानुकूलित इलेक्ट्रिक बसेसमुळे संगमनेरच्या सार्वजनिक वाहतूक व्यवस्थेला आधुनिक व पर्यावरणपूरक स्वरूप प्राप्त झाले असून प्रवाशांना अधिक आरामदायी प्रवासाची सुविधा उपलब्ध झाली आहे.

लोकार्पण सोहळ्यानंतर आमदार खताळ यांनी स्वतः महायुतीच्या पदाधिकाऱ्यांसह नाशिक रोडच्या दिशेने बसमधून फेरफटका मारला. यावेळी त्यांनी बसमधील नवीन आसन व्यवस्था, वातानुकूलित यंत्रणा व इतर सोयी-सुविधांची प्रत्यक्ष पाहणी केली.

संगमनेर आगार व्यवस्थापक निलेश बेंडकुळे यांनी दिलेल्या माहितीनुसार, या नवीन बसेसपैकी काही बसेसच्या पुणे मार्गावर दर अर्ध्या तासाच्या अंतराने नियमित फेऱ्या सुरू करण्यात आल्या आहेत. या फेऱ्या सातत्याने सुरू राहणार असून उर्वरित बसेस जिल्ह्यातील इतर प्रमुख मार्गांवर धावणार आहेत.

या सोहळ्याला संगमनेर आगार व्यवस्थापक निलेश बेंडकुळे, उत्तम कर्पे, वसंत देशमुख, आबासाहेब थोरात, ज्ञानेश्वर कर्पे, रमेश काळे, आरपीआयचे कैलास कासार आणि नगरसेविका साक्षी सूर्यवंशी यांच्यासह शिवसेना-महायुतीचे पदाधिकारी व कार्यकर्ते मोठ्या संख्येने उपस्थित होते.

दरम्यान, ज्येष्ठ अभिनेते नाना पाटेकर यांच्या निधनामुळे उपस्थितांनी दोन मिनिटे स्तब्ध उभे राहून त्यांना श्रद्धांजली अर्पण केली. नाना पाटेकर यांनी आपल्या अभिनयाच्या जोरावर मराठी व हिंदी चित्रपटसृष्टीत स्वतःचा वेगळा ठसा उमटवला असून, त्यांच्या स्मृतींना या कार्यक्रमात अभिवादन करण्यात आले.