माजी आमदार बाळासाहेब दांगट यांचा ठाकरे यांच्या उपस्थितीत शिवसेनेत प्रवेश
महाराष्ट्र संवाद न्यूज नेटवर्क
शिवसेनेतील अंतर्गत कुरघोड्यांना कंटाळून बाहेर पडलेले आणि काँग्रेसमध्ये न रमलेले जुन्नरचे माजी आमदार बाळासाहेब दांगट यांनी पक्षप्रमुख उद्धव ठाकरे यांच्या उपस्थितीत पुन्हा शिवबंधन हाती बांधले आहे.
शिवसेनेच्या फाटाफुटीनंतर पुणे जिल्ह्यातील खासदार श्रीरंग बारणे, माजी राज्यमंत्री विजय शिवतारे, माजी खासदार शिवाजीराव आढळराव पाटील, माजी आमदार शरद सोनवणे यांनी मुख्यमंत्री एकनाथ शिंदे गटाचा रस्ता निवडल्याने पुणे जिल्ह्यात शिवसेनेचे मोठी पडझड झाली होती.
माजी आमदार बाळासाहेब दांगट यांच्या रूपाने ही पडझड रोखण्यासाठी आणि शिवसेना मजबूत करण्यासाठी पक्षप्रमुख उद्धव ठाकरे यांना मोठी मदत मिळणार आहे. दांगट यांच्या माध्यमातून ठाकरे आता पुण्यातील या फुटीर नेत्यांचा करेक्ट कार्यक्रम करण्याची चिन्हे आहेत. पक्षांतर्गत मोठ्या बडाळीनंतर आणि सत्ता गमवावी लागल्यानंतर उद्धव ठाकरे यांनी शिवसेनेतून बाहेर पडलेल्या अनेक नेत्यांना पुन्हा घरट्यात परतण्याचे आवाहन केले होते.
पक्षांतर्गत खरोखोडींना कंटाळून दोनदा आमदार राहिलेले दांगट यांनी शिवसेनेची साथ सोडली होती त्यानंतर काँग्रेसमध्ये गेलेले दांगट तेथेही फारसे रमले नाही. एकनाथ शिंदेंच्या बंडानंतर राज्यात अनेक ठिकाणी उद्धव ठाकरेंना हादरे बसले आहेत. त्यानंतर ठाकरेंनी जुन्या नेत्यांना पुन्हा साद घालत शिवसेनेत आणण्याचा प्रयत्न केला. बाळासाहेब दांगट हे सलग दोनदा अनुक्रमे १९९० आणि १९९५ मध्ये जुन्नर तालुक्यातून शिवसेनेचे आमदार म्हणून निवडून आले होते. त्यानंतर २००४ मध्ये झालेल्या निवडणुकीत त्यांना पराभवाला सामोरे जावे लागले. शिवसेनेतील अंतर्गत कलहामुळे पराभवाला सामोरे जावे लागलेल्या दांगट यांनी शिवसेनेला ‘जय महाराष्ट्र’ केला होता. त्यानंतर त्यांनी काँग्रेसचा ‘हात’ हातात घेतला होता.
माजी आमदार दांगट यांच्यासह जुन्नरचे राष्ट्रवादी काँग्रेसचे शहराध्यक्ष संतोष ऊर्फ बाबा परदेशी, माजी पंचायत समिती सदस्य सुनिल ढवळे, खेड पंचायत समितीचे माजी उपसभापती अमोल पवार, खेड भाजप युवा मोर्चाचे अध्यक्ष राहुल येवले यांनीदेखील शिवसेनेत प्रवेश केला आहे.
