महाराष्ट्र संवाद न्यूज नेटवर्क
शिवसेना फुटीनंतर राज्यात उद्भवलेला खरी शिवसेना कोणाची हा पेच कायम असतांना केंद्रीय निवडणूक आयोगाने शिवसेना प्रमुख उध्दव ठाकरेंना मोठा धक्का दिला आहे. शिवसेनेचे धनुष्यबाण चिन्ह तात्पुरत्या स्वरुपात गोठविण्यात आले असून मुख्यमंत्री एकनाथ शिंदे आणि शिवसेना प्रमुख उध्दव ठाकरे या दोघांनाही शिवसेना नांव वापरता येणार नसल्याचा निर्वाळा आयोगाने दिला आहे. पोटनिवडणूकीपुरता हा निर्णय असल्याचे सांगितले जाते.
मुख्यमंत्री एकनाथ शिंदे यांनी त्यांचीच खरी शिवसेना असल्याचा व धनुष्यबाण चिन्हदेखील त्यांच्याच गटाचे असल्याचा दावा केला होता. यामुळे राज्यात शिवसेनेत दोन गट पडले होते. मुख्यमंत्री एकनाथ शिंदे आणि माजी मुख्यमंत्री उध्दव ठाकरे या दोन गटात शिवसेना विभागली गेल्यामुळे शिवसेनेत अभूतपूर्व पेच निर्माण झाला होता. यासंदर्भातील न्यायालयीन लढाई सुरु असतांना चिन्ह व पक्षासंबधी निर्णय घेण्याचे अधिकार न्यायालयाने निवडणूक आयोगाला दिले होते. त्यामुळे यासंदर्भात निवडणूक आयोगासमोर सुनावणी झाली.
निवडणूक आयोगाला शिवसेना कोण याचा फैसला करता आला नसल्याने हा अंतरीम निर्णय घेण्यात आला आहे. या निर्णयामुळे उध्दव ठाकरेंना अंधेरी पोटनिवडणूकीत धनुष्यबाण हे चिन्ह वापरता येणार नाही. हा निर्णय तात्पुरत्या स्वरुपाचा असून आगामी निवडणुकीपुरता मर्यादीत आहे. त्यामुळे ठाकरेना निवडणूकीत दुसरे चिन्ह घ्यावे लागणार असून त्यासाठीचे पर्याय आयोगाने शिवसेनेकडून मागविले आहेत. उध्दव ठाकरे आता कोणते चिन्ह घेवून आगामी अंधेरी निवडणूकीला सामोरे जातात. याकडे लक्ष लागले आहे. शिवसेनेसंदर्भात ठोस निर्णय आयोगाला घेता आला नसल्याने आयोगाने दोन्ही गटाला शिवसेना नांव वापरता येणार नसल्याचे म्हटले आहे. यासंदर्भात पुढील सुनावणी दहा तारखेला होणार आहे.
गेल्या तीन दशकांपासून धनुष्यबाण चिन्ह शिवसेनेची अस्मीता बनले होते. पक्षातील फुटीनंतर आणि निवडणूक आयोगाच्या एका निर्णयानंतर धनुष्यबाण चिन्ह गोठविण्यात आल्याने आता हे चिन्ह शिवसेनेच्या हातून निसटले आहे. त्यामुळे पोटनिवडणुकीत ठाकरेंना नवे चिन्हे घ्यावे लागणार आहे. दरम्यान ढाल किंवा गदा यापैकी एक चिन्ह ठाकरे निवडण्याची शक्यता वर्तविली जात आहे. सोमवारपर्यत नव्या चिन्हासाठी ठाकरेंना तीन पर्याय सादर करण्याची मुदत देण्यात आली आहे.
