महाराष्ट्र संवाद न्यूज नेटवर्क
काँग्रेसच्या अध्यक्षपदी अखेर अपेक्षेप्रमाणे मल्लिकार्जुन खरगे मोठ्या मताधिक्याने निवडून आले आहे. त्यांनी त्यांचे प्रतिस्पर्धी उमेदवार शशी थरूर यांचा पराभव केला. खरगे यांना 7897 तर थरूर यांना एक हजारावर मते मिळाली असल्याची माहिती आहे.
मल्लिकार्जुन खरगे यांची काँग्रेसच्या अध्यक्षपदी निवड होईल, असा विश्वास निवडणुकीपूर्वीच व्यक्त केला जात होता. खरगे हे काँग्रेस नेत्या खासदार सोनिया गांधी आणि खासदार राहुल गांधी यांचे निकटवर्ती मानले जातात. काँग्रेसच्या एक व्यक्ती एक पद या धोरणानुसार खरगे यांनी निवडणुकीच्या पार्श्वभूमीवर यापूर्वीच राज्यसभेतील विरोधी पक्ष नेतेपदाचा राजीनामा दिला होता. 80 वर्षे वयाचे खरगे हे कर्नाटकातील आहे.
काँग्रेस अध्यक्षपदासाठी गेल्या 24 वर्षात प्रथमताच निवडणूक झाली. या निवडणुकीसाठी 96 टक्के मतदान झाले होते. मल्लिकार्जुन खरगे आणि शशी थरूर या दोघांमध्ये सरळ लढत झाली यात खरगे यांना 7897 तर थरूर यांना 1072 मते मिळाली.
काँग्रेसच्या 137 वर्षाच्या इतिहासातील ही सहावी निवडणूक आहे. यापूर्वी 1939, 1950, 1977, 1997 आणि 2000 मध्ये निवडणूक झाली होती. 1997 मध्ये सिताराम केसरी शरद पवार आणि राजेश पायलट यांच्यामध्ये झालेल्या लढतीत सिताराम केसरी यांचा विजय झाला होता. तर 2000 मध्ये झालेल्या निवडणुकीत जितेंद्र प्रसाद यांचा पराभव करत सोनिया गांधी यांची अध्यक्षपदी वर्णी लागली होती. आत्ताच्या निवडणुकीत गांधी परिवाराचे निकटवर्ती असलेल्या खरगे यांच्या रूपाने काँग्रेसला दलित चेहरा अध्यक्ष म्हणून मिळाला आहे.
