शरद पवार म्हणाले; “पण… सरकार कुठे आहे” राज्यातून प्रकल्प बाहेर जात आहे याची सरकारला काळजी नाही

आजारपणातही शरद पवारांनी पदाधिकाऱ्यांना केले मार्गदर्शन

महाराष्ट्र संवाद न्यूज नेटवर्क

महाराष्ट्रातून मोठ मोठे प्रकल्प राज्याबाहेर जात आहे, याची सरकारला कोणतेही काळजी नाही. राज्यात ओला दुष्काळ निर्माण झाला आहे. शेतकरी मदतीची वाट बघतोय मात्र अशा स्थितीत सरकार कुठे आहे? असा प्रश्न निर्माण होतो. पुरोगामी विचारांची कास सोडू नका, आगामी काळात पक्ष वाढवावा लागणार असून निवडणुकांसाठी कामाला लागा, असा आदेश राष्ट्रवादीचे संस्थापक अध्यक्ष शरद पवार यांनी दिला.

शुक्रवारपासून शिर्डीमध्ये राष्ट्रवादी काँग्रेसचे “राष्ट्रवादी मंथन, वेध भविष्याचा” हे दोन दिवसांचे शिबिर सुरू आहे. प्रकृती अस्वस्थामुळे चार दिवसांपासून रुग्णालयात उपचार घेत असलेले शरद पवार या शिबिरासाठी उपस्थित राहणार की नाही, अशी स्थिती निर्माण झाली असतानाच पवार यांनी आज सकाळी रुग्णालयातून डिस्चार्ज घेत शिबिरात हजेरी लावली. आणि काही वेळ पदाधिकाऱ्यांना मार्गदर्शनही केले. नंतर त्यांचे भाषण राष्ट्रवादीचे ज्येष्ठ नेते माजी मंत्री दिलीप वळसे पाटील यांनी वाचून दाखवले.

पवार म्हणाले, मला डॉक्टरांनी दहा-पंधरा दिवस आराम करण्याचा सल्ला दिला आहे. तरी देखील मी तब्येत बरी नसताना सगळ्यांच्या इच्छेचा मान राखण्यासाठी इथे तुमच्यासाठी आलो. मला सविस्तर बोलणं शक्य नाही. जास्त बोलू नका असे डॉक्टरांनी सांगितले आहे. माझा तुम्हा कार्यकर्त्यांवर विश्वास आहे. पक्ष मजबूत करा असा सल्ला त्यांनी पदाधिकारी, कार्यकर्त्यांना दिला.

प्रकृती ठीक नसल्यामुळे जास्त बोलू शकत नाही असे सांगितल्यानंतर दिलीप वळसे पाटील यांनी पवारांचे उर्वरित भाषण वाचून दाखविले.