महाराष्ट्र संवाद न्यूज नेटवर्क
सातत्याने भारतीय जनता पार्टी आणि शिंदे गटावर टिकास्त्र सोडणारे पुण्याचे माजी महापौर आणि राष्ट्रवादी कॉग्रेसमधील मातब्बर नेते व प्रवक्ते अंकुश काकडे यांच्या कन्या मेघना काकडे-माने यांनी मातोश्रीत उध्दव ठाकले यांच्या उपस्थितीत ‘शिवबंधन’ हाती बांधले आहे.
मुंबईच्या अंधेरीस्थित असलेल्या काकडे-माने यांनी शिवसेना उध्दव बाळासाहेब ठाकरे पक्षात प्रवेश करत ‘मशाल’ हाती घेतल्याची राजकीय वर्तुळात चर्चा सुरु होती. काकडे-माने यांच्या शिवसेना प्रवेशावेळी पक्षप्रमुख उध्दव ठाकरे यांच्यासह नीलम गोर्हे, सुषमा अंधारे, अनिल परब, सचिन अहिर, आदेश बांदेकर हे प्रमुख नेते यावेळी उपस्थित होते.
काकडे-माने यांचे वडील अंकुश काकडे हे राष्ट्रवादीतील बडे प्रस्थ आहे. राष्ट्रवादी कॉग्रेसचे ते प्रवक्ते असून आजही त्यांनी राष्ट्रवादीच्या नेत्या खासदार सुप्रीया सुळे यांच्यावर शिंदे गटाचे मंत्री अब्दुल सत्तार यांनी केलेल्या टिकेला जोरदार उत्तर दिले होते. ‘मा. देवेद्र-नाथ त्या सत्तारला माफी मागण्यास सांगा, नाही तर त्याच काय करायचं ते आम्ही करु’ अशा शब्दात त्यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना एका ट्विटद्वारे इशारा दिला होता.
काकडे-माने यांच्या शिवसेना उध्दव बाळासाहेब ठाकरे पक्षातील प्रवेशाचा आगामी काळात पक्षाला काय फायदा होतो, हे लवकरच समजेल.
