महाराष्ट्र संवाद न्यूज नेटवर्क
माजी मुख्यमंत्री उद्धव ठाकरे यांना धक्का देत शिवसेनेच्या आणखी एका खासदाराने मुख्यमंत्री एकनाथ शिंदे यांच्या गटाची वाट धरली आहे. खासदार गजानन कीर्तिकर यांनी मुख्यमंत्री एकनाथ शिंदे यांच्या गटामध्ये प्रवेश केला आहे.
शिंदे गटात गेलेले खासदार गजानन कीर्तिकर हे शिवसेनेच्या स्थानीय लोकाधिकार समितीचे अध्यक्ष आहेत. कीर्तीकर शिंदें सोबत गेल्याने स्थानिक लोकाधिकार समिती देखील त्यांच्या रूपाने शिंदे गटाची ताकद वाढविणारी ठरणार आहे. 
मुंबईतील माहीम विधानसभा नागरिक सत्कार सोहळ्यानिमित्त रवींद्र नाट्य मंदिरात आयोजित कार्यक्रमात मुख्यमंत्री एकनाथ शिंदे यांच्या उपस्थितीत खासदार कीर्तीकर यांनी शिंदे यांच्या नेतृत्वाखालील (बाळासाहेबांची शिवसेना) पक्षात प्रवेश केला. यामुळे शिंदे गटातील खासदारांची संख्या आता तेरावर गेली आहे. येत्या काही दिवसात होऊ घातलेल्या मुंबई महापालिकेच्या निवडणुकी अगोदरच कीर्तीकरांनी ठाकरेंची साथ सोडल्याने ठाकरे गटासाठी हा धक्का मानला जात आहे.
शिंदे गटाच्या खासदारांमध्ये ‘यांचा’ आहे समावेश
गजानन कीर्तिकर, श्रीकांत शिंदे, राहुल शेवाळे, सदाशिव लोखंडे, भावना गवळी, कृपाल तुमने, हेमंत गोडसे, हेमंत पाटील, प्रतापराव जाधव, धैर्यशील माने, राजेंद्र गावित, संजय मंडलिक आणि श्रीरंग बारणे या खासदारांचा शिंदे गटात समावेश आहे.
