महाराष्ट्र संवाद न्यूज नेटवर्क
उत्तर नगर जिल्ह्यात भारतीय जनता पक्षाने राबविलेल्या ‘धन्यवाद मोदीजी’ अभियानाने राज्यात वरचे स्थान मिळविले आहे. अभियानात उत्तर नगर जिल्ह्याचा समावेश पहिल्या पाच जिल्ह्यात करण्यात आला असल्याची माहिती देण्यात आली आहे.
भारतीय जनता पार्टीचे उत्तर नगर जिल्हाध्यक्ष राजेंद्र गोंदकर यांच्या मार्गदर्शनाखाली उत्तर नगर जिल्ह्यात ‘धन्यवाद मोदीजी’ अभियान कार्यक्षमतेने राबविले. अभियानाने राज्यात पहिल्या पाच जिल्ह्यात स्थान प्राप्त केल्याने अभियानाचे संयोजक राजेंद्र सांगळे, सहसंयोजक अनिल भनगडे, अंकुश काळे यांच्यासह भाजयुमोचे जिल्हाध्यक्ष श्रीराज डेरे यांच्यासह उत्तर नगर जिल्ह्यातील कार्यकर्त्यांचे अभिनंदन होत आहे.
भारतीय जनता पक्षाचे प्रदेशाध्यक्ष माजी मंत्री चंद्रशेखर बावनकुळे यांच्या नेतृत्वाखाली राज्यात हे अभियान राबविण्यात आले. एकट्या उत्तर नगर जिल्ह्यामध्ये भाजप कार्यकर्त्यांनी १७१२५ पोस्टकार्ड लाभार्थ्यांच्या घरोघर जावून गोळा केले होते.
मंगळवारी (ता. १५) या अभियानाचे जिल्हा संयोजक राजेंद्र सांगळे व सहसंयोजक अनिल भनगडे, आनंद बुधेकर व राजेश शर्मा यांनी मुंबईत प्रदेश कार्यालयामध्ये जाऊन गोळा केलेले हे पोस्टकार्ड उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे यांच्या उपस्थितीत या अभियानाच्या प्रदेश संयोजिका श्वेता शालीनी, सहसंयोजक हर्षल विभांडीग यांच्याकडे जमा केले.
उत्तर नगर जिल्ह्याच्या या कामगिरीचे उपमुख्यमंत्री देवेंद्र फडणवीस, चंद्रशेखर बावनकुळे यांनी उत्तर नगर जिल्ह्यातील पदाधिकाऱ्यांचे कौतुक केले. महसूल मंत्री राधाकृष्ण विखे पाटील, माजी आमदार स्नेहजा कोल्हे, माजी आमदार बाळासाहेब मुरकुटे, माजी आमदार वैभव पिचड यांनीदेखील संयोजक, कार्यकर्ते व पदाधिकाऱ्यांचे कौतुक केल्याची माहिती प्रसिध्दी प्रमुख दिनेश सोमाणी यांनी दिली.
