महाराष्ट्र संवाद न्यूज नेटवर्क
येणारी शिर्डी लोकसभा मतदारसंघाची निवडणूक भारतीय जनता पक्ष स्वतंत्ररीत्या ‘कमळ’ या निवडणुक चिन्हावर लढविणार आहे. त्यामुळे कार्यकर्त्यांनी निवडणुकीच्या कामास सुरुवात करावी, असे आवाहन लोकसभा प्रवास योजना राज्य संयोजक माजी मंत्री संजय भेगडे यांनी केले आहे.
उत्तर नगर जिल्हा भारतीय जनता पार्टीच्या शिर्डी लोकसभा प्रवास योजनेसंदर्भात जिल्हास्तरीय बैठक शिर्डी येथे राज्य संयोजक व माजी मंत्री बाळा भेगडे यांच्या उपस्थितीत पार पडली. यावेळी जिल्हाध्यक्ष राजेंद्र गोंदकर, माजी आमदार चंद्रशेखर कदम व बाळासाहेब मुरकुटे, संघटन सरचिटणीस नितीन दिनकर आदी उपस्थित होते.
भेगडे म्हणाले, देशातील काही लोकसभा मतदारसंघावर भारतीय जनता पक्षाने लक्ष केंद्रित केले आहे. राज्यात असे अठरा मतदारसंघ आहे की जिथे भारतीय जनता पक्षाने कधीच आपला उमेदवार दिलेला नाही. त्यापैकी शिर्डी लोकसभा मतदारसंघ आहे. यावेळी मात्र या मतदारसंघात भारतीय जनता पार्टीचा उमेदवार असेल. हा मतदारसंघ भाजपच्या ताब्यात येण्यासाठी सर्व कार्यकर्त्यांना मेहनत घ्यावयाची आहे.
गुजरात निवडणुकीनंतर स्वतः पंतप्रधान नरेंद्र मोदी, केंद्रीय गृहमंत्री अमित शहा, भाजपाचे राष्ट्रीय अध्यक्ष जे. पी. नड्डा यांचा या मतदारसंघात दौरा होणार आहे. तर जलजीवन मंत्री प्रल्हाद सिंह पटेल या मतदारसंघाचे पालक असून “हर घर जल, नल से जल” ही पंतप्रधान मोदींची महत्त्वकांक्षी योजना येथे राबविली जात आहे. याशिवाय या मतदारसंघात एक हजार कोटी पेक्षा जास्त निधींची विकास कामे सुरू आहेत. याचा देखील फायदा लोकसभा निवडणुकीत पक्षाला मिळेल असा आत्मविश्वास भेगडे यांनी व्यक्त केला.
यावेळी जिल्हा सरचिटणीस सुनील वाणी, जिल्हा उपाध्यक्ष नितीन कापसे, सुधाकर गुंजाळ, गणेश राठी, अकोले तालुकाध्यक्ष सिताराम भांगरे, संगमनेर तालुकाध्यक्ष सतिष कानवडे, कोपरगाव तालुकाध्यक्ष साहेबराव रोहम, शहराध्यक्ष दत्ता काळे, श्रीरामपूर तालुकाध्यक्ष दिपक पटारे, शहराध्यक्ष मारुती बिंगले, महिला आघाडीच्या जिल्हाध्यक्ष सोनाली नाईकवाडी, जिल्हा प्रसिद्धी प्रमुख राम आहेर आदीनी मागील दौऱ्याचे अनुभव कथन केले. 
यावेळी शिर्डीचे नगराध्यक्ष शिवाजी गोंदकर व जिल्हा उपाध्यक्ष गिरजाजी जाधव यांचे हस्ते माजी मंत्री भेगडे यांचा सत्कार करण्यात आला. प्रास्तविक जिल्हा संयोजक नितीन दिनकर यांनी तर सूत्रसंचालन योगीराज परदेशी यांनी केले. आभार सोशल मिडिया सेलचे जिल्हा संयोजक भाऊसाहेब वाकचौरे यांनी मानले.
