महाराष्ट्र संवाद न्यूज
शिंदे फडणवीस सरकारचा पहिल्या टप्प्यातील मंत्रिमंडळ विस्तार झाल्यानंतर दुसऱ्या टप्प्यातील विस्ताराला अद्याप मुहूर्त लागलेला नाही. हिवाळी अधिवेशनापूर्वी मंत्रिमंडळ विस्तार होण्याची शक्यता लांबणीवर पडली आहे. मुख्यमंत्री एकनाथ शिंदे यांनी आपल्याकडील अतिरिक्त खात्यांचा कार्यभार अन्य मंत्र्यांकडे सोपविल्याने मंत्रिमंडळ विस्तार रखडण्याची चिन्हे निर्माण झाली आहेत.
हिवाळी अधिवेशनाच्या पार्श्वभूमीवर मंत्रिमंडळ विस्तार न करता मुख्यमंत्री शिंदे यांनी आपल्याकडील नऊ खात्यांचा अतिरिक्त पदभार अन्य मंत्र्यांकडे सोपविला गेल्याचे सांगितले जाते. मुख्यमंत्री-उपमुख्यमंत्र्यांसह सध्याच्या शिंदे-फडणवीस सरकारच्या मंत्रिमंडळात वीस मंत्री कार्यरत आहेत.
अधिवेशनापूर्वी मंत्रिमंडळ विस्तार केला जावा अशी मुख्यमंत्री शिंदे गटातील समर्थक आमदार आणि भाजपच्या आमदारांची मागणी होती. त्यामुळे नव्याने मंत्रिमंडळ विस्तार करून पुन्हा खातेवाटप जाहीर केले जाईल अशी शक्यता वर्तविली जात होती. मात्र मुख्यमंत्र्यांनी आपल्याकडील अतिरिक्त पदभार अन्य मंत्र्यांकडे सोपविल्याने हिवाळी अधिवेशनापूर्वी मंत्रिमंडळ विस्तार होण्याची शक्यता मावळली. मात्र महामंडळावरील नियुक्ती जाहीर केल्या जाण्याची शक्यता वर्तवली जात आहे.
मिळालेल्या माहितीनुसार मुख्यमंत्र्यांनी कोणाकडे सोपविला कोणत्या खात्याचा पदभार …
उद्योग मंत्री उदय सामंतांकडे माहिती आणि तंत्रज्ञान खात्याची जबाबदारी.
राज्य उत्पादन शुल्क मंत्री शंभूराजे देसाई यांच्याकडे परिवहन, सार्वजनिक बांधकाम (सार्वजनिक उपक्रम खाते).
बंदरे, खनिकर्म मंत्री दादा भुसे यांच्याकडे पणन खाते.
अन्न आणि औषध प्रशासन मंत्री संजय राठोड यांच्याकडे सामाजिक न्याय आणि विशेष सहाय्य खाते.
सार्वजनिक आरोग्यमंत्री तानाजी सावंत यांच्याकडे मृद आणि जलसंधारण खाते.
कृषी मंत्री अब्दुल सत्तार यांच्याकडे अल्पसंख्याक आणि औकाफ खाते.
शालेय शिक्षणमंत्री दीपक केसरकर यांच्याकडे पर्यावरण व वातावरणीय बदल, सामान्य प्रशासन ही खाती.
रोजगार हमी योजना मंत्री संदिपान भुमरेंकडे मदत आणि पुनर्वसन, आपत्ती व्यवस्थापन खाते.
पाणी पुरवठा मंत्री गुलाबराव पाटलांकडे माहिती आणि जनसंपर्क खाते सोपविण्यात आले असल्याची माहिती मिळते.
