महाराष्ट्र संवाद न्यूज
बापलेकीच्या नात्याला काळीमा फासत आपल्या अल्पवयीन चौदा वर्षे वयाच्या मुलीवर बापाने अत्याचार केल्याची धक्कादायक घटना समोर आली आहे. माणुसकीला आणि नात्याला काळीमा फासणारी ही घटना नगरच्या एमआयडीसी पोलीस ठाण्याच्या हद्दीमध्ये घडली आहे.
यासंदर्भात पीडित मुलीच्या तक्रारीवरून बापाविरोधात एमआयडीसी पोलीस ठाण्यात अत्याचार, पोक्सो कायद्यानुसार गुन्हा दाखल करण्यात आला आहे. बापाने दोनदा अत्याचार केल्याचे तक्रारीत म्हटले आहे.
मुलीच्या असहाय्यतेचा गैरफायदा घेत तिच्यावर 15 एप्रिल 2022 रोजी पुणे येथे अत्याचार करण्यात आला. त्यानंतर 12 जून 2022 रोजी सायंकाळी मामाच्या गावी सोडण्यासाठी घेऊन जात असताना कोल्हार घाट बहिरवाडी शिवार (ता. नगर) येथील जंगलात तिच्यावर अत्याचार केला. ही घटना घरी आई आणि बहिणीला सांगितल्यास तिला जीवे ठार मारण्याची धमकी देण्यात आली.
पीडित मुलीच्या आईने तिला मानसिक आधार दिल्यानंतर गुरुवारी 15 डिसेंबरला रात्री अहमदनगरच्या एमआयडीसी पोलीस ठाण्यात बाबा विरोधात फिर्याद दिली. पीडित मुलीच्या बापाविरोधात भारतीय दंड संहिता तसेच बाललैंगिक अत्याचार प्रतिबंधक कायदा पोस्को नुसार गुन्हा दाखल करण्यात आला आहे.
अहमदनगर ग्रामीणचे पोलीस उपाधीक्षक अजित पाटील सहाय्यक निरीक्षक युवराज आठरे यांनी घटनास्थळी भेट दिली असून पोलीस उपनिरीक्षक चांगदेव हंडाळ पुढील तपास करत आहे. दरम्यान बापानेच पुढच्या मुलीवर केलेल्या अत्याचारामुळे समाजामध्ये संताप व्यक्त होत आहे.
