महाराष्ट्र संवाद न्यूज
नागपूर : विधानसभा अध्यक्षांना अपशब्द वापरल्याचा कारणावरून राष्ट्रवादी काँग्रेसचे प्रदेशाध्यक्ष जयंत पाटील यांना नागपूर अधिवेशन कालावधीसाठी निलंबित करण्यात आले आहे. विरोधी महाविकास आघाडीसाठी सत्ताधारी शिंदे फडणवीस सरकारकडून दिला गेलेला हा मोठा धक्का समजला जात आहे.
नागपूर विधिमंडळाच्या हिवाळी अधिवेशनात चौथ्या दिवशी अभिनेता सुशांत सिंह राजपूत याची एक्स मॅनेजर दिशा सालियान हिच्या संशयास्पद मृत्यू प्रकरणाची एसआयटी चौकशी केली जाईल, असं उपमुख्यमंत्री आणि गृहमंत्री देवेंद्र फडणवीस यांनी सभागृहात सांगितले. यावेळी विरोधकांना बोलू दिले जात नसल्याचा आरोप करत विरोधी आमदार वेलमध्ये उतरले.
यावेळी आमदार जयंत पाटील यांनी विधानसभा अध्यक्षांना उद्देशून असंविधानिक शब्द उच्चारत अध्यक्षांना सुनावले. यावेळी त्यांनी अध्यक्षांना उद्देशून अपशब्द उच्चारल्याचा आरोप त्यांच्यावर सत्ताधाऱ्यांकडून करण्यात आला. त्यामुळे या प्रकरणी जयंत पाटील यांना एक वर्षासाठी निलंबित करण्याची मागणी सत्ताधाऱ्यांकडून आक्रमकपणे करण्यात आली. मुख्यमंत्री एकनाथ शिंदे, उपमुख्यमंत्री देवेंद्र फडणवीस देखील यावेळी आक्रमक झाल्याचे बघावयास मिळाले.
त्यानंतर या संदर्भात विधानसभा अध्यक्षांचा दालनामध्ये झालेल्या बैठकीनंतर जयंत पाटील यांना अधिवेशन कालावधीसाठी निलंबित करण्याचा निर्णय घेण्यात आला. जयंत पाटील यांनी विधानसभा अध्यक्षांबद्दल अपशब्द वापरून सभागृहाची प्रतिष्ठा मलीन केली. सर्वोच्च सभागृहाचा अवमान केला. त्यांच्या अशा वक्तव्याकडे दुर्लक्ष केल्यास चुकीचा पायंडा निर्माण होईल. त्यांचे सदस्यत्व रद्द करण्याचा ठराव आला व मुंबई व नागपूर येथील विधिमंडळाच्या परिसरात त्यांना अधिवेशन कालावधी बंदी करण्यात आली असल्याचे विधानसभा अध्यक्ष राहुल नार्वेकर यांनी म्हटले आहे.
