महाराष्ट्र संवाद न्यूज
संगमनेर – सहकारातील दीपस्तंभ थोर स्वातंत्र्य सेनानी सहकार महर्षी भाऊसाहेब थोरात यांच्या जयंती शताब्दी निमित्त वर्षभरात सहकार, कृषी व शैक्षणिक क्रांतीचा महोत्सव साजरा होणार असून या निमित्त विविध उपक्रम राबविण्यात येणार आहे. या पार्श्वभूमीवर भाऊसाहेब थोरात यांचे छायाचित्र असलेल्या शताब्दी महोत्सवाचा लोगोचे अनावरण करण्यात आले आहे.
यांनी केले अनावरण आणि यांची होती उपस्थिती: सहकार महर्षी भाऊसाहेब थोरात सहकारी साखर कारखान्याच्या अतिथीगृहावर काँग्रेस पक्षाचे नेते आमदार बाळासाहेब थोरात यांच्या हस्ते या लोगोचे अनावरण करण्यात आले. यावेळी माजी आमदार डॉ. सुधीर तांबे, नगराध्यक्ष दुर्गाताई तांबे, ज्येष्ठ नेते बाजीराव खेमनर, शंकर खेमनर, डॉ. जयश्रीताई थोरात, रामहरी कातोरे, मिलिंद कानवडे, सोमेश्वर दिवटे, अजय फटांगरे, आर. बी राहणे, निखिल पापडेजा, अर्चना बालोडे, सुनंदा जोर्वेकर, निर्मला गुंजाळ, संतोष हासे, सुधाकर जोशी, कार्यकारी संचालक जगन्नाथ घुगरकर, अनिल शिंदे, बाबुराव गवांदे यांच्यासह अमृत उद्योग समूहातील व संगमनेर तालुक्यातील विविध संस्थांचे पदाधिकारी व युवक कार्यकर्ते उपस्थित होते.
आमदार थोरात म्हणाले, सहकार महर्षी भाऊसाहेब थोरात यांनी सहकार हा आपल्या जीवनाचा मार्ग निवडताना संगमनेर तालुक्याच्या ग्रामीण विकासाचा पाया घातला. सहकारी चळवळीसाठी त्यांनी दिलेली तत्वे देशाला मार्गदर्शक असून त्यांच्या जन्मशताब्दी निमित्त कृषी, सहकार, शिक्षण, समाजकारण या विविध क्षेत्रात उपक्रम राबवले जाणार आहे. यामध्ये विविध व्याख्याने, सेमिनार, नवनवीन तज्ञांचे मार्गदर्शन, सांस्कृतिक कार्यक्रम अशा विविध कार्यक्रमांचा समावेश असेल. शेती व सहकारात काम करताना भाऊसाहेब थोरात यांनी साहित्य संस्कृतीही जपली आहे. त्यांच्या विचारांशी एकनिष्ठता या त्यांच्या तत्त्वांवर आपले तालुक्याचे राजकारण सुरू आहे.
संगमनेरकरांनाही उपक्रमा संबंधी कल्पना मांडता येणार:
सन 2024 हे सहकारमहर्षी, तीर्थरूप भाऊसाहेब थोरात यांचे जन्मशताब्दी वर्ष. यानिमित्ताने तीर्थरूप दादांच्या स्मृतींना उजाळा देण्यासोबतच विविध उपक्रमांच्या माध्यमातून त्यांचा विचार जनसामान्यांपर्यंत पोहोचविण्याचे काम केले जाणार आहे. आज त्यांच्या जन्मशताब्दी वर्षाच्या लोगोचे अनावरण… pic.twitter.com/iBeGasW06A
— Balasaheb Thorat (@bb_thorat) August 6, 2023
डॉ. तांबे म्हणाले, भाऊसाहेब थोरात यांनी सहकारातून तालुक्यात समृद्धी निर्माण केली. संगमनेर तालुका शिक्षण, समाजकारण, आरोग्य ग्रामीण विकास यामध्ये पुढे आहे. त्यांच्या दूरदृष्टीतून प्रत्येकाच्या जीवनात क्रांती निर्माण झाली असून थोरात यांच्या प्रति प्रत्येकाच्या मनात कृतज्ञता आहे. हे वर्ष जन्मशताब्दी वर्ष असून या निमित्त विविध उपक्रम राबवण्यात येणार आहेत.
दुर्गाताई तांबे म्हणाल्या, सहकार महर्षी भाऊसाहेब थोरात यांनी वयाच्या अवघ्या १८ व्या वर्षी स्वातंत्र्यसंग्रामात स्वतःला झोकून दिले. स्वातंत्र्यप्राप्तीनंतर त्यांनी ग्राम विकासासाठी सहकाराचा मार्ग निवडला. वयाच्या 84 व्या वर्षी पर्यावरण संवर्धनासाठी दंडकारण्य अभियान आपल्याला दिले. तालुक्यातील प्रत्येकाच्या जीवनात परिवर्तन घडवणाऱ्या स्वर्गीय भाऊसाहेब थोरात यांच्या जन्मशताब्दी निमित्त विविध कार्यक्रमांमधून आपल्या सर्वांना नक्कीच प्रेरणा मिळणार आहे.
प्रास्ताविक कॅन्सरतज्ञ डॉ. जयश्री थोरात यांनी केले तर कार्यकारी संचालक जगन्नाथ घुगरकर यांनी आभार मानले.
