महाराष्ट्र संवाद न्यूज
मुंबई – राज्य शासनाकडून देण्यात येणाऱ्या क्रांतीज्योती सावित्रीबाई फुले राज्यस्तरीय पुरस्कारासाठी अहमदनगर जिल्ह्यातून वृषाली कडलग, लक्ष्मीकांत ईडलवार, मंगेश कडलग व नरेंद्र राठोड यांची निवड झाली आहे. मुंबईत शिक्षक दिनी (5 सप्टेंबर) या पुरस्कारांचे वितरण करण्यात येणार असल्याची माहिती देण्यात आली.
108 शिक्षकांचा समावेश: राज्य शासनाकडून दिल्या जाणाऱ्या क्रांतीज्योती सावित्रीबाई फुले 2022-2023 या वर्षीच्या राज्यस्तरीय शिक्षक गुणगौरव पुरस्कारांची यादी जाहीर करण्यात आली आहे. यावर्षी राज्यातील 108 शिक्षकांना या पुरस्काराने सन्मानित केले जाणार आहे. यात अहमदनगर जिल्ह्यातील संगमनेर, अकोले, जामखेड व राहुरी येथील शिक्षकांचा समावेश आहे.
पुणे विभागातून कडलग: राज्याच्या शालेय शिक्षण विभागाच्या वतीने दिल्या जाणाऱ्या या पुरस्कारासाठी निवड झालेल्या वृषाली कडलग या संगमनेर तालुक्यातील धांदरफळच्या देशमुख मळा येथील जिल्हा परिषद प्राथमिक शाळेतील उपक्रमशील शिक्षक आहेत. त्यांना पुणे विभागातून क्रांतीज्योती सावित्रीबाई फुले राज्य शिक्षक गुणगौरव पुरस्काराने सन्मानित करण्यात येणार आहे.
यांचाही समावेश: तर अहमदनगरच्या जामखेड तालुक्यातील नायगाव जिल्हा परिषद प्राथमिक शाळेचे शिक्षक लक्ष्मीकांत ईडलवार यांना प्राथमिक विभागातून, रयत शिक्षण संस्थेच्या सात्रळ राहुरी येथील कोंडाबाई नानासाहेब कडू पाटील कन्या विद्यालयाचे शिक्षक मंगेश कडलग यांना माध्यमिक विभागातून व अकोले तालुक्यातील खिरविरे केंद्राच्या तिर्थाचीवाडी येथील जिल्हा परिषद प्राथमिक शाळेचे शिक्षक नरेंद्र राठोड यांना आदिवासी क्षेत्रातून हा पुरस्कार जाहीर करण्यात आला आहे.
