महाराष्ट्र संवाद न्यूज
संगमनेर – शिक्षक दिनाचे औचित्य साधून मंगळवारी 5 सप्टेंबर राज्यातील 108 शिक्षकांचा क्रांतीज्योती सावित्रीबाई फुले आदर्श शिक्षक पुरस्काराने सन्मान करण्यात आला. यात संगमनेर तालुक्यातील धांदरफळच्या देशमुख मळा येथील जिल्हा परिषद प्राथमिक शाळेतील उपक्रमशील शिक्षिका वृषाली कडलग यांचा समावेश होता.
कार्यक्रमावेळी हे होते उपस्थित: मुंबईच्या नरिमन पॉईंटवरील टाटा थिएटर, नॅशनल सेंटर फॉर परफॉर्मिंग आर्ट येथे झालेल्या या पुरस्कार वितरण सोहळ्यासाठी राज्याचे मुख्यमंत्री एकनाथ शिंदे, उपमुख्यमंत्री अजित पवार, विधानसभेचे अध्यक्ष राहुल नार्वेकर, कपिल पाटील, कौशल्य विकास विभाग तथा मुंबईचे पालकमंत्री मंगलप्रभात लोढा, खासदार अरविंद सावंत, शिक्षण आयुक्त सुरज मांढरे यांच्या उपस्थितीत राज्याचे शालेय शिक्षण मंत्री दीपक केसरकर यांच्या हस्ते या पुरस्कारांचे वितरण करण्यात आले.
या कार्याची घेतली दखल: एक लाख दहा हजार रुपये, मानचिन्ह व प्रमाणपत्र असे कडलग यांना मिळालेल्या क्रांतीज्योती सावित्रीबाई फुले आदर्श शिक्षक पुरस्काराचे स्वरूप आहे. कडलग यांनी शाळेच्या भौतिक व शैक्षणिक विकासासाठी लोकसहभागातून केलेल्या कार्याची या पुरस्कारासाठी दखल घेण्यात आली. त्यांनी शाळा आयएसओ प्रमाणित करण्याबरोबरच शाळा सौर ऊर्जा प्रकाशित केली आहे. पर्यावरण संवर्धनासाठी त्यांनी नो प्लास्टिक उपक्रम राबविला. गावातील ग्रामस्थांना एकत्र आणत लोकसहभागातून शाळेचा भौतिक विकास साधण्याची किमया कडलग यांनी साधली.
हे उपक्रम राबविले: कोरोना काळात विद्यार्थ्यांना ऑनलाइन मार्गदर्शन, राष्ट्रीय स्तरावर शैक्षणिक मासिकात ५ संशोधनपर प्रबंध सादरीकरण, राष्ट्रीय, राज्य, जिल्हा स्तरावरील नियतकालिकात १० पेक्षा जास्त लेख प्रसिध्द, शासनाच्या दिक्षा ॲप, व्ही स्कूल ॲपसारख्या वेब पोर्टलवर १४ व्हिडीओ प्रसिध्द तसेच यु ट्युब चॅनल, शैक्षणिक ब्लॉग या माध्यमातून शैक्षणिक व्हिडीओची निर्मिती, नाविन्यपूर्ण उपक्रम सोलर सिस्टिम, रेन वॉटर हार्वेस्टिंग, परसबाग, औषधी वनस्पती एक मूल एक झाड, डिजीटल स्कूल, काच फलक, ११ टॅबचे वाटप, ११ सायकलींचे वाटप, ११ विद्यार्थी दत्तक, कंपोस्ट खत, शैक्षणिक सहल, आनंदी शाळा, वाचन पेटी, ग्रंथालय, पेपर कट्टा, ओला सुका ई कचरा नियोजन, बालोद्यान, विज्ञानप्रदर्शन प्रथम क्रमांक, इनरव्हीलमध्ये (International NGO) सदस्य असतांना २१ शाळा डिजीटल केल्या. हॅन्ड सॅनिटायझर मशिन, ज्ञानरचनावादी साहित्य, प्लॅस्टिक मुक्त भारत उपक्रम अशा कार्याची दखल घेण्यात आली आहे.
अभिनंदन: याशिवाय इनरव्हील क्लब ऑफ संगमनेरच्या त्या माजी प्रेसिडेंट असून त्यांच्या सामाजिक व शैक्षणिक योगदानाचा या पुरस्कारासाठी विचार करण्यात आला. कडलग यांचे नगर विकास विभाग मंत्रालय मुंबईचे उपसचिव विजय चौधरी, गटविकास अधिकारी अनिल नागणे, गटशिक्षणाधिकारी बाळासाहेब गुंड, विस्तार अधिकारी सुवर्णा फटांगरे, एकनाथ भांगरे, केंद्र प्रमुख दत्ता कर्पे, मुख्याध्यापक हनुमंत अडांगळे यांनी अभिनंदन केले आहे.
