महाराष्ट्र संवाद न्यूज
संगमनेर – जनआरोग्यम परिवार व जाणीव फाउंडेशनच्यावतीने दिला जाणारा ‘लोकनेते बाळासाहेब थोरात गुणगौरव पुरस्कार’ जिल्हा परिषद प्राथमिक शाळा वडझरी खुर्द येथील पदवीधर शिक्षिका श्रीमती सुरेखा आनंदराव भालेराव यांना प्रदान करण्यात आला.
यांच्या उपस्थितीत झाला कार्यक्रम: नाशिक पदवीधर मतदारसंघाचे माजी आमदार डॉ. सुधीर तांबे, माजी नगराध्यक्ष दुर्गाताई तांबे, नाशिक जिल्हा परिषद सदस्या सिमंतिनी कोकाटे, नाशिक मराठा विद्या प्रसारक समाजाचे नितीन ठाकरे, संगमनेर वकील संघाचे अध्यक्ष ॲड. उदयसिंह ढोमसे पाटील आदींच्या उपस्थितीत सह्याद्री महाविद्यालयात नुकताच हा कार्यक्रम झाला. यावेळी जिल्ह्यातील व जिल्ह्याबाहेरील पुरस्कार्थी मोठ्या संख्येने उपस्थित होते.
या कामाची दखल: भालेराव गेली २५ वर्षे जिल्हा परिषदेच्या प्राथमिक शाळेत सेवा बजावत आहेत. कोपरगाव तालुक्यातील पोहेगाव शाळेतून नोकरीची सुरुवात करून, संगमनेर तालुक्यातील भागवतवाडी, करुले, तळेगाव दिघे, तिगाव व वडझरी खुर्द येथे काम करत असताना त्यांनी सातत्याने गरजू व होतकरू विद्यार्थ्यांना मदतीचा हात दिला. सेवेच्या दरम्यान विद्यार्थ्यांच्या सर्वांगीण विकासासाठी वेगवेगळे उपक्रम राबवले. यामध्ये अप्रगत विद्यार्थ्यांसाठी अतिरिक्त पूरक मार्गदर्शन, किशोरवयीन मुलींसाठी आरोग्य विषयक जाणीवजागृती, तालुकास्तरीय गणित विज्ञान प्रदर्शनात सहभाग आदी वैशिष्ट्यपूर्ण उपक्रम राबवले.
यांचीही होती उपस्थिती: त्यांच्या या कार्याची दखल घेऊन त्यांना लोकनेते बाळासाहेब थोरात गुणगौरव पुरस्काराने सन्मानित करण्यात आले. यावेळी आदिवासी सेवक बाबा खरात, जिल्हा परिषद सदस्य अजय फटांगरे इत्यादी मान्यवर उपस्थित होते.
परिश्रम: कार्यक्रमाच्या यशस्वितेसाठी जनआरोग्यम व जाणीव फाउंडेशनचे अध्यक्ष बाळासाहेब हेंद्रे, कार्याध्यक्ष अमित पाटणकर, समन्वयक अंतोन मिसाळ, उपाध्यक्ष भाऊसाहेब काकड, संदीप काकड, बाळासाहेब पुलाटे आदींनी परिश्रम घेतले.
